Taǵdyrǵa moıymaǵan chempıon: Ǵanı Berdihanulynyń jeńiske toly joly
AQTAÝ. KAZINFORM — Ómirde adamdy shyńdaıtyn synaqtar az emes. Biraq sol qıyndyqqa moıymaı, taǵdyrdyń aýyr soqqysyn jańa múmkindikke aınaldyra alatyn jandar sırek. Solardyń biri — paýerlıftıngten birneshe dúrkin Qazaqstan chempıony, halyqaralyq jarystardyń júldegeri, Aqtaýlyq Ǵanı Berdihanuly. Aıaǵynan aıyrylsa da, ómirge degen qulshynysyn joǵaltpaǵan sportshy búginde Paralımpıada oıyndaryna qatysýdy maqsat etip, ózgelerge de úmit syılap júr.
Bir sátte ózgergen ómir
Ǵanı sportpen bala kezinen aınalysty. 11 jasynan dzıýdoǵa qatysyp, keıin boks pen kıkboksıngke den qoıdy. Bolashaǵyn sportpen baılanystyrǵan jigittiń armany — halyqaralyq jarystarda el namysyn qorǵaý edi. Alaıda 27 jasynda bolǵan qaıǵyly oqıǵa onyń ómirin túbegeıli ózgertti.
— Birde dostarymmen ańǵa shyqtyq. Qarýdy qoldaný kezinde qaýipsizdik talaptary saqtalmaı, aıaǵym aýyr jaraqattandy. Aýrýhanaǵa jetkenshe kóp qan joǵalttym. Dárigerler ómirimdi saqtaý úshin aıaǵymdy tizeden joǵary kesýge májbúr boldy, — dep eske alady sportshy.
Bul oqıǵa kıkboksıngten álem kýbogyna attanýyna nebári bir apta qalǵanda bolǵan.
— Barlyq daıyndyq sol jarysqa baǵyttalǵan edi. Bir sátte bári ózgerdi. Psıhologııalyq turǵydan óte aýyr boldy. Sportpen birjola qoshtastym dep oıladym, — deıdi ol.
Sportqa oralǵan sát
Jaraqattan keıin Ǵanı alty jyldaı kásibı sporttan alystap, otbasynyń qamy úshin kásippen aınalysqan. Alaıda qozǵalystyń azaıýynan salmaq qosyp, qaıtadan sportqa bet burýǵa sheshim qabyldaıdy.
Alǵashynda erekshe jandarǵa arnalǵan sport klýbynda otyryp oınaıtyn voleıbolmen aınalysady. Keıin bapker Arslan Súıinshalıev onyń dene bitimine qarap, paýerlıftıngke kelýge keńes bergen.
— 2019 jyldyń sáýirinen bastap kásibı túrde paýerlıftıngpen aınalysa bastadym. Osy sport meniń ómirge degen senimimdi qaıta oıatty, — deıdi Ǵanı Berdihanuly.
Qazaqstannyń 10 dúrkin chempıony
Tabandylyq pen úzdiksiz jattyǵýdyń nátıjesi kóp kúttirgen joq. Ol 2019 jyly alǵashqy Qazaqstan chempıonatynda jeńimpaz atandy. Kelesi jyly kúmis júlde ıelenip, keıin el birinshiliginde chempıon atandy.
Qazir Ǵanı Berdihanuly — paýerlıftıngten tirek-qımyl apparaty zaqymdalǵan sportshylar arasynda 10 dúrkin Qazaqstan chempıony, 11 márte el rekordyn jańartqan sportshy. Halyqaralyq arenalarda da el namysyn abyroımen qorǵap keledi. Anglııa men Taılandta ótken álem kýbogy kezeńderinde úsh márte qola júldege ıe bolǵan.
Basty maqsat — Paralımpıada
Sportshy qazir aldaǵy mańyzdy jarystarǵa daıyndalyp jatyr.
— Tamyz aıynda Aqtaýda Qazaqstan chempıonaty ótedi. Sol irikteýden súrinbeı ótsek, Bahreınde ótetin álem chempıonatyna baramyz. Eń úlken armanym — Paralımpıada oıyndaryna qatysyp, Qazaqstannyń týyn álemdik dodada kóterý, — deıdi ol.
Otbasy — eń úlken tirek
Ǵanı óziniń barlyq jetistiginiń artynda otbasynyń qoldaýy turǵanyn erekshe atap ótti.
— Qıyn kezeńnen anamnyń, týǵan-týystarymnyń, dostarymnyń qoldaýynyń arqasynda óttim. Ásirese jubaıyma alǵysym sheksiz. Ol árdaıym janymnan tabylyp, senim syılady. Sport maǵan qaıtadan ómirge qulshynys berdi, — deıdi sportshy.
Ózgelerge demeý bolyp júr
Búginde Ǵanı tek sportpen ǵana shektelmeıdi. Qoǵamdyq qor arqyly múmkindigi shekteýli azamattardyń sportpen aınalysýyna, jumysqa ornalasýyna qoldaý kórsetip keledi. Ol aýyr jaraqat alyp, ómirden túńilgen adamdarmen jıi kezdesip, olardyń ómirge qaıta beıimdelýine kómektesedi.
— Men saly sýǵa ketip, sanadaǵy san saýalǵa jaýap taba almaı, sansyraǵan jandardyń rýhyn oıatýǵa, kóńiline demeý bolýǵa tyrysamyn. Mundaı jaǵdaıǵa tap bolǵan adam alǵashynda ózin jalǵyz sezinedi. Keıbiri ómirden túńilip ketýi de múmkin. Sondyqtan eń bastysy — olardyń janynan tabylyp, úmit syılaý, — deıdi ol.
Ǵanı Berdihanulynyń ómir joly — taǵdyrdyń aýyr synaǵy adamdy toqtatpaıtynyn dáleldeıtin jarqyn mysal. Erik-jiger men tabandylyqtyń arqasynda ol sportqa qaıta oralyp qana qoımaı, elimizdiń úzdik parasportshylarynyń birine aınaldy. Búginde ol jeńisimen ǵana emes, ózgelerge úmit syılap, ómirge qushtarlyq uıalata bilýimen de kópshilikke úlgi bolyp otyr.
Buǵan deıin, qabyrǵaǵa jan bitirgen sheber týraly jazǵanbyz.
