Taǵdyrdan teperish kórdik degen oıdan arylýymyz qajet — Memleket basshysy
ASTANA. KAZINFORM – Prezıdent búgingi ahýalǵa ótkenniń ólshemimen qarap, únemi keshegi kúnmen ómir súrýge bolmaıdy. Tarıhqa barynsha keń aýqymda qaraǵan jón. Biz taǵdyrdan teperish kórdik degen oıdan arylýymyz qajet. Ótkenge jaltaqtaý — álsizdiktiń belgisi ekenin aıtty.
— Tarıhqa degen kózqaras qaı kezde de saıası ahýaldyń yqpalynda ketpeýge tıis. Biraq ókinishke qaraı, qazir bul barlyq jerde úırenshikti jaǵdaıǵa aınaldy. Kúni keshe ǵana jer-kókke syıǵyzbaı madaqtalǵan tarıhı tulǵalar ǵalym-symaqtardyń qalaýymen jaǵymsyz adamǵa aınalyp sala beredi. Kerisinshe, bir kezde atyna qara tańba basylǵan saıası qaıratkerler túrli nasıhatshylardyń arqasynda tanymal bolyp shyǵa keledi. Al qýǵyn-súrgindi uıymdastyrýshylar men oryndaýshylar qaharmanǵa aınalyp ketti, — dedi Memleket basshysy.
Qasym-Jomart Toqaev taǵdyrdan teperish kórdik degen oıdan arylýymyz qajet ekenin aıtty.
— Biz jazyqsyz qýǵyn-súrginge ushyraǵan memleket jáne qoǵam qaıratkerleriniń, ǵalymdar men dárigerlerdiń, sondaı-aq, olardyń týystary men jubaılarynyń esimin umytpaýymyz kerek. Biraq qandaı aýyr bolsa da, ótken kúnderdiń qasireti elimizdiń damýyna, ósip-órkendeýine kedergi bolmaýǵa tıis.
Búgingi ahýalǵa ótkenniń ólshemimen qarap, únemi keshegi kúnmen ómir súrýge bolmaıdy. Tarıhqa barynsha keń aýqymda qaraǵan jón. Biz taǵdyrdan teperish kórdik degen oıdan arylýymyz qajet. Ótkenge jaltaqtaý — álsizdiktiń belgisi.
Qazaq halqy táýelsiz jáne egemen el bolý jolynda san túrli qıyndyqty artqa tastap, kóptegen syn-qaterdi eńserdi. Sondyqtan, táýelsizdik — bárinen qymbat qasterli uǵym ekenin sanaǵa sińirýimiz qajet. Jalpyulttyq birligimizdi kózdiń qarashyǵyndaı saqtap, memlekettigimizdi nyǵaıtý mańyzdy. Taǵy da qaıtalap aıtamyn: ótkendi umytpaı, tól tarıhymyzǵa qurmetpen qaraý — durys, demek, biz tek alǵa qaraı júrip, jarqyn bolashaqqa umtylýymyz kerek, — dedi Prezıdent.
Aıta ketelik Prezıdent «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine barǵan edi.