Taǵamnan ýlaný derekteri boıynsha 8 qylmystyq is qozǵaldy
ASTANA. KAZINFORM – Qazaqstanda bıyl toptyq taǵamnan ýlaný derekteri boıynsha 8 qylmystyq is qozǵaldy. Onyń altaýy boıynsha sotqa deıingi tergep-tekserý júrip jatyr, eki is sotqa joldandy.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.
Onyń sózinshe, bıyl bilim berý jáne tárbıeleý uıymdarynda toptyq taǵamnan ýlaný jaǵdaıy tirkelmegen.
Soǵan qaramastan, tirkelgen árbir ýlaný deregi boıynsha epıdemıologııalyq tergep-tekserý júrgizildi. Nátıjesinde sanıtarııalyq talaptardyń óreskel buzylǵany anyqtaldy. Atap aıtqanda, keıbir nysandarda ruqsat qujattary bolmaǵan, mindetti medıtsınalyq tekserýden ótpegen qyzmetkerler jumysqa jiberilgen. Sonymen qatar taǵam daıyndaý tehnologııasy men azyq-túlikti saqtaý tártibi oryndalmaǵan.
– Barlyq 8 jaǵdaı boıynsha materıaldar quqyq qorǵaý organdaryna joldandy. Sonyń negizinde 8 qylmystyq is qozǵaldy. Onyń altaýy boıynsha tergep-tekserý jalǵasyp jatyr, eki is sotqa berildi. Kináli tulǵalar zańǵa sáıkes jaýapkershilikke tartyldy, – dedi Sarhat Beısenova.
Aıta keteıik, buǵan deıin Qazaqstanda bıyl tirkelgen jiti ishek ınfektsııasy jaǵdaılarynyń 71 paıyzdan astamy 14 jasqa deıingi balalardyń úlesine tıesili ekeni týraly jazǵan edik.
