Taǵamnan ýlanbaý úshin neni eskerý kerek
ASTANA. KAZINFORM — Kúnniń ysýyna baılanysty taǵamnan ýlaný qaýpi de artady. Bul jóninde Astana qalasynyń kommýnıkatsııalar qyzmeti uıymdastyrǵan brıfıngte Astana qalasynyń sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva málimdedi.
— Taǵamnan ýlaný — lastanǵan taǵam arqyly aǵzaǵa túsken zııandy mıkroorganızmderdiń áserinen bolatyn as qorytý júıesiniń jedel buzylysy. Onyń negizgi qozdyrǵyshtary — altyn tústi stafılokokk, ishek taıaqshasy jáne salmonella bakterııalary, — dedi ol.
Mamannyń sózinshe, aýa temperatýrasy joǵarylaǵandyqtan, taǵamdardyń buzylýy merzimi de qysqarady.
— Ýlanýdyń basty sebepteri — merzimi ótken ónimderdi paıdalaný, taǵamdy durys saqtamaý jáne daıyndamaý, jeke bas gıgıenasy talaptarynyń saqtalmaýy. Ásirese tez buzylatyn ónimder men daıyn taǵamdar erekshe qaýip týdyrady. Temperatýralyq rejımniń buzylýy bakterııalardyń jyldam kóbeıýine ákeledi. Sondyqtan tutynýshylar ónimniń sapasyna, saqtaý jáne daıyndalý jaǵdaıyna erekshe nazar aýdarýy qajet, — dedi ol.
Aıta keteıik, buǵan deıin Batys Qazaqstanda 140-tan astam adam jiti ishek juqpalarymen aýyrǵanyn jazǵanbyz.
