Taǵamnan basqa taýardy sertıfıkattaıtyn sýbektilerge memlekettik baqylaýdy kúsheıtý qajet
ASTANA. QazAqparat - Azyq-túlik emes taýarlarǵa sertıfıkat beretin sýbektilerge memlekettik baqylaýdy kúsheıtý qajet. Búgin Úkimettiń selektorlyq rejimdegi otyrysynda «Atameken» ulttyq kásipkerler palatasynyń tóraǵasy Abylaı Myrzahmetov osylaı málim etti, dep habarlaıdy QazAqparat tilshisi.
«Azyq-túlik emes taýarlardyń barlyǵyn sertıfıkattaý jeke sýbektilerge berilgen. Ókinishke oraı «Kásipkerler» kodeksinde osy akkredıtteý sýbektilerine táýekelderdi basqarý júıesi qaralmaǵan. Olarǵa tek aldyn alý túrindegi baqylaý bar. Al olardyń qyzmetterine qarap otyrsaq, memlekettiń tarapynan qatań baqylaý bolmasa erteń otandyq kásipkerlerdiń qyzmetine de, tutynýshylarǵa da keri áserin tıgizedi», - dedi Abylaı Myrzahmetov.
Máselen, onyń dereginshe, Iran, Qytaı, Polsha, Reseıden ımporttalǵan tsementterge 224 sertıfıkat berilgen. Alaıda sertıfıkattyń 199-y zań buzýshylyqpen alynǵan.
«Sondyqtan bul salada jumys isteıtin sýbektilerge memlekettik baqylaýdy kúsheıtip, aldyn alý túrindegi baqylaý emes táýekelderdi basqarý júıesi arqyly qatań talap qoıylýy kerek. Tipti, akkredıtteý quqyn alý túrindegi qatań jaza qoldanýdy usynyp otyrmyz. Osy jyldan bastap kásipkerlerdiń jaýapkershiligin arttyrý úshin tehnıkalyq retteý salasyndaǵy buzýshylyq úshin aıyppul kólemin 3 esege kóbeıdi. Qadaǵalaý merzimi 2 aıdan 3 jylǵa deıin sozyldy. Bul durys sharalar dep oılaımyn», - dedi ol.
