Taǵamǵa jalǵan jarnama jasaǵan McDonald's musylmandarǵa 700 myń dollar tóleýge kelisti
ASTANA. 23 qańtar. QazAqparat - McDonald's meıramhanalar jelisiniń basshylyǵy Detroıttaǵy musylmandar qaýymdastyǵynyń múshelerine 700 myń dollar tóleıtin boldy.
Bul jaıynda Lenta.ru habarlap otyr.
Asa iri kompanııa áldebir taǵamdy musylmandar erejesine saı ázirlengen dep, jalǵan jarnama jasaǵany úshin aıyptalyp otyr. Osyǵan baılanysty 2011 jyldyń qyrkúıek aıynda Mıchıgan shtatyndaǵy Dırborn-Haıts qalasynyń Ahmet esimdi turǵyny tıisti oryndarǵa shaǵym túsiredi. Onyń aıtýynsha, ol McDonald's meıramhanalarynyń birinen taýyq etinen jasalǵan gambýrger satyp alady. Kóp uzamaı onyń halal ónimnen daıyndalmaǵanyn anyqtaıdy.
Muslim.kz saıtynyń jazýynsha, shaǵym túsirýshiniń qorǵaýshysy málimdegendeı, AQSh-ta halal taǵamy ázirlenetin McDonald's-tyń bir fılıaly ǵana bar. Sondaı-aq, halal ónimderi taýsylǵanda olardyń ornyna ádettegi ıngredıentterdi paıdalanatynyna kóz jetkizgen.
Ahmet shaǵymnyń shartyna sáıkes aıyppul retinde óndirip alǵan aqshasyn osy meıramhana ashylǵan sátten bastap, onyń taǵamyn tutynǵan barlyq turǵyndarǵa úlestirip beretinin aıtty. Bul múmkin bolmaǵandyqtan, qarajat Detroıttaǵy medıtsınalyq emhananyń, AQSh-taǵy Arab ulttyq murajaıynyń jáne qorǵaýshylardyń kerek-jaraǵy men qajettilikterine jumsalatyn boldy.
