Taǵamdy qaldyqtardan jasaıtyn meıramhana ashyldy
ASTANA. QazAqparat - Brıtandyq Lıds qalasynda qaldyqtardan taǵam ázirleıtin he Real Junkfood Project meıramhanasy ashyldy.
Jaqyn mańdaǵy sýpermarketter, meıramhanalar men dámhanalar onyń ashanasyna ózderi paıdalana almaıtyn ónimderdi jetkizetin kórinedi. Al Adam Smıt esimdi azamattyń basshylyǵymen jas aspazshylar men eriktiler bul azyq-túlik ónimderin qunarly ári dámdi taǵamdarǵa aınaldyrýǵa sheber eken.
Meıramhananyń as máziri qoljetimdi ónimderge baılanysty kúndelikti ózgerip otyrǵanymen, onda et pen kókónisterden daıyndalǵan ystyq taǵamdar, tuzdyqtar jáne tamaqtan keıin beriletin jemis nemese tátti taǵamdar turaqty túrde ázirlenedi. Keıbir kezderde meıramhanaǵa ýyldyryq, trıýfel sańyraýqulaǵy, qymbat irimshikter men qyzyl balyq ta jetkiziledi.
Bul meıramhanada naqty belgilengen baǵa joq, ıaǵnı oǵan tamaqtanýǵa kelgen adamdar ózderiniń nıetine qaraı aqysyn tóleıdi. Al qaltasynda múldem aqshasy bolmaǵandar tústik astaryna eseptesý úshin júk tasýshy nemese ashanada kómekshi jumysshy qyzmetterin atqarýy tıis, dep jazady sheteldik BAQ.
