TAG-Org iri bilim berý uıymy Qazaqstanda ókildigin ashpaq
ASTANA. QazAqparat - Álemniń túrli óńirlerinde kásibı jáne bilim berý qyzmetterin kórsetetin 80 ókildigi bar «Talal Abý-Gazale» (TAG-Org) oqytý uıymy Astanada óz fılıalyn ashýdy josparlaýda.
Bul jaıynda QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Joldaýyna qatysty pikir bildirgen atalǵan uıymnyń negizin qalaýshy Talal Abý-Gazale málim etti, dep habarlaıdy QazAqparat.
«Eliniń jáne halqynyń damýy men ál-aýqatyna qatysty bolǵan kezde kez kelgen kishkentaı ǵana detalǵa aıryqsha mán berýimen belgili Prezıdent Nazarbaev óziniń tarıhı sóz sóıleýinde jańǵyrtý baǵdarlamasyn jalǵastyrýdaǵy mindettemesin pash etken bolatyn. Qazaqstan Prezıdenti Nursultan Nazarbaevtyń biregeı jáne kóregen saıasatynyń jáne barlyq saladaǵy jınaqtalǵan jetistikterdiń arqasynda el ekonomıka, bilim berý, taý-ken óndirisi, ónerkásip, ınvestıtsııa, qyzmet kórsetý, densaýlyq saqtaý, ınfraqurylym, týrızm, aýyl sharýashylyǵy, bıznes, banktik jáne saıası reformalardy damytý jolynda úlken jetistikke jetip otyr», - dedi sarapshy.
Onyń atap ótýinshe, Qazaqstan Ortalyq Azııadaǵy halyqaralyq qyzmettiń barlyq túri úshin barynsha tartymdy orynǵa aınalyp keledi.
«Degenmen, atalǵan úndeýde naqty kórsetilgendeı, Prezıdent ilgerileý qarqyny kózge kórinip tursa da bárine az qanaǵattanyp otyrǵan sııaqty. Memleket basshysy onan da zor jetistikterdi josparlap otyrǵandaı. Prezıdent Nursultan Nazarbaevtyń naqty kórsetip bergen damýdaǵy órshil josparlary barsha qazaqstandyqtar úshin zor maqtanyshtyń sebepkeri, sonymen qatar basqa da elder úshin model bolýy tıis. Osy sátti paıdalana otyryp, Qazaqstan Úkimetimen bilim berýdiń kásibı qyzmeti salasyndaǵy álemdik kóshbasshy retindegi bizdiń uıymnyń tájirıbesimen jáne resýrstarymen bóliskim keletindigin aıtpaqpyn. Prezıdent Joldaýyn tyńǵylyqty zerdeleı kele Astanada «Talal Abý-Gazale Grýpp» fılalyn ashý qajettiligine senimdi bola tústim», - dep atap ótti Talal Abý-Gazale.
