Taekvondoshy Nursultan Mamaev Ýnıversıadanyń tórtinshi medalin Qazaqstan qorjynyna saldy
ASTANA. QazAqparat - Qazaqstandyq taekvondoshy Nursultan Mamaev Kvanjý qalasynda (Koreıa Respýblıkasy) ótip jatqan jazǵy Ýnıversıadada 58 keli salmaq dárejesinde chempıon atandy.
Bul týraly Sporttyq jekpe-jek jáne kúsh qoldanylatyn sport túrleri konfederatsııasynyń baspasóz qyzmetinen habarlady.
Jerlesimiz aldymen Komoranyń sportshysyn jeńip, odan soń ózbekstandyq Temirbek Ýrolovtan basym tústi. Shırek fınalda Nursultan avstralııalyq Adrıan Abeldy 17:5 esebimen utyp, al jartylaı fınalda ırandyq Djavad Amırısorhıdi 17:16 esebimen súrindirdi.
Aqtyq kezdesýde qazaqstandyq brazılııalyq mektebiniń ókili Rebellý Bragansamen kúsh synasty. Kezdesý 2:0 esebimen qazaqstandyqtyń paıdasyna sheshildi. Osylaısha, taekvondodan Qazaqstan quramasynyń úzdigi Nursultan Mamaev elimizdiń qorjynyna 2015 jylǵy Ýnıversıadanyń tórtinshi "altynyn" saldy.
