Taekvondodan Parıj Olımpıadasynyń joldamalary Qytaıda sarapqa salynady

ASTANA. KAZINFORM – Taekvondodan parıj Olımpıadasynyń joldamalary sarapqa salynatyn Azııa irikteý týrnıri qytaıdyń Taıan qalasynda ótedi.

Atalǵan irikteý týrnıri 15-16 naýryz kúnderine josparlanǵan.

Azııa irikteý týrnırinde Qazaqstan atynan tórt sportshy qatyspaq. 

Olar — Marııa Sevostıanova (57 kelige deıin), Jansel Denız (67 keliden joǵary), Samırhon Ababakırov (58 kelige deıin) jáne Batyrhan Tóleýǵalı (80 kelige deıin) Parıjdegi Olımpıada oıyndarynyń joldamalary úshin talasady.

Aıta ketsek, ázirge Qazaqstan quramasynyń qorjynynda sporttyń 8 túri boıynsha 19 joldama bar. Sportshylarymyz sadaq atýdan — 4, tas joldaǵy velosporttan — 3, nysana kózdeýden — 5, qazirgi bessaıystan — 2, bokstan — 2, grek-rım kúresinen — 1, erkin kúresten — 1, sporttyq gımnastıkadan — 1 joldama jeńip alǵan.

Frantsııa tórinde alaýy tutanatyn XXXIII jazǵy Olımpıada oıyndary osy jyldyń 26 shildesi men 11 tamyzy aralyǵynda ótedi.