Taekvondodan Qazaqstan chempıonaty Shymkentte ótedi

ASTANA. QazAqparat - 9 qarasha kúni Shymkent qalasynda taekvondodan Qazaqstan birinshiligi bastalady, dep habarlaıdy QazAqparat.

QR Ulttyq olımpıadalyq komıtetiniń baspasóz qyzmeti habarlaýynsha, el chempıonatyna barlyq aımaqtan jalpy esebi 235 sportshy qatysady.

Jyl saıyn ótetin ulttyq birinshilikten soń sportshylar chempıondyq ataqty ıelenip qana qoımaı, Qazaqstan quramasyna shaqyrtý alady. Sol sebepti, jastardyń da, tájirıbeli taekvondoshylardyń da jeńimpaz atanýǵa bar kúshin salary anyq.

Qazaqstan birinshiligine ulttyq quramanyń úzdikteri qatysady. Tek, Taıbeı Prezıdentiniń kýboginde baq synaıtyn Rýslan Japarov, Smaıyl Dúısebaı, Nurlan Myrzabaev pen Jansel Denız jarystan bosatylǵan.

Sondaı-aq, jasóspirimder arasynda jaqsy jetistigimen kózge túsken sportshylarǵa eresekter arasynda synǵa túsýge ruqsat etildi. Halyqaralyq týrnırlerdiń jeńimpazy Shyńǵys Sándibaev pen Qabı Maqsat ulttyq chempıonatta óz myqtylyǵyn dáleldemek.