Taekvondodan Azııa chempıonaty: Qazaqstan 14 «altyn» enshiledi
ASTANA. QazAqparat - Qazaqstan quramasy Malaızııada ótken ITF taekvondodan Azııa chempıonatynda 22 medal enshiledi, dep habarlaıdy QazAqparat Astana qalasy ákimdiginiń baspasóz qyzmetine silteme jasap.
ITF taekvondodan 2018 jylǵy Azııa chempıonaty 30 qarasha men 2 jeltoqsan aralyǵynda Malaızııa astanasy Kýala-Lýmpýr qalasynda ótti. Qazaqstandyq sportshylar qurlyq chempıonatyna alǵash ret qatysqanyna qaramastan, aıtarlyq tabyspen oraldy.
Azııa chempıonatyna ártúrli elderden 600-ge jýyq sportshy qatysty. Qazaqstan ulttyq quramasy dodaǵa 12 sportshysyn apardy. Olar: Bıbarys Bolat, Aıdyn Isqalıev, Arsen Amangeldınov, Aıbek Máýlen, Aıbek Egizbaev, Stepan Anohın, Ekaterına Nurperzentova, Jadyra Onjanova, Vıacheslav Tsoı, Talǵat Saıdalın, Igor Nı, Islam Ánýarbek.
Qazaqstandyq sportshylar qajyrly eńbek, utymdy taktıka, ata-analarynyń qoldaýynyń arqasynda joǵary nátıjelerge qol jetkizdi. Sportshylarymyzdyń sany az bolǵanymen, medaldardy molynan utty.
Stepan Anohın, Talǵat Saıdalın jáne Ekaterına Nurperzentova jáne týrnırdiń eń jas qatysýshysy, 8 jasar Bıbarys Bolat árqaısysy eki ret «altyn» ıelenip, Azııanyń absolıýtti chempıondary atandy.
Bulardan tys, Arsen Amangeldınov, Aıdyn Isqalıev, Vıacheslav Tsoı jáne Islam Ánýarbek ta qorjynǵa altyn saldy. Sheberligin tanytqan Jadyra Onjanova kúmis, al Aıbek Egizbaev, Máýlen Aıbek jáne Igor Nı qola medaldarǵa ıe boldy.
Sonymen, halyqaralyq sanattaǵy bapkerler Erlan jáne Nurlan Ábenovter baptaǵan qazaqstandyqtar 14 altyn, 2 kúmis jáne 6 qola medal enshiledi. Qurama músheleriniń eshbiri júldesiz oralǵan joq.
