Taekvondodan álem chempıony Batyrhan Tóleýǵalı óz jeńisiniń syryn aıtty
ASTANA. KAZINFORM - Taekvondodan 21 jasqa deıingi sportshylar arasynda álem chempıony atanǵan Batyrhan Tóleýǵalı (87 keli) Kazinform tilshisine sportqa kelýi men aldaǵy maqsaty jóninde aıtyp bergen edi.
- Jankúıerler seniń kóptegen jarysta bıik belesti baǵyndyryp júrgenińdi jaqsy biledi. Taekvondoǵa neshe jasyńda qadam bastyń?
- Men 2006 jyly qazirgi Abaı oblysy Aıagóz aýdanynda dúnıege kelgenmin. Alǵash ret taekvondoǵa qadam basqanymda nebári jeti jasta edim. Oǵan ata-anam qoldaý bildirdi. Alǵashqy bapkerim – Erkin Qusaıynov. Sodan beri sporttyń osy túriniń qyr-syryna qanyǵyp kelemin. Sheberligimdi jetildirýge kóńil bóldim. Tájirıbemdi arttyrýǵa mán berdim. Tájirıbeli bapkerler meni kóptegen jarysqa alyp bardy. Sheberligimdi shyńdap kelemin. Áli de baǵyndyratyn belesimiz alda dep oılaımyn.
- Byltyr qazaqstandyq taekvondoshylar joǵary deńgeıde oıyn kórsetti deýge bolady. Jarystarǵa daıyndyq barysy qalaı ótti?
- Árbir jeńis úlken ter tógý arqyly keletini belgili. Bedeldi báseke aldynda bilikti bapkerler bizdiń jarysqa ázirlik barysymyzdy tarazylaıdy. Bul oraıda olardyń eńbegin joǵary baǵalaýǵa turarlyq. Byltyr biz udaıy daıyndyq júrgizýge mán berdik. Óıtkeni, kóptegen halyqaralyq jarystar jalaýyn kóterip, onda elimizdiń namysyn abyroımen qorǵaýǵa kóńil bólindi. Sheberligimizdi shyńdap, tájirıbemizdi arttyrýǵa kóńil bóldik.
Kóptegen halyqaralyq deńgeıde oqý-jattyǵý jıynyna qatystyq. Dúnıejúzilik jarystarda joǵary tabysqa qol jetkizýge qol jetti. Bizdiń tabysty oıyn kórsetýdiń negizgi sebebiniń biri osyndaı qamqorlyqtyń nátıjesinen bolsa kerek-ti.
Bul biz úshin kez kelgen básekede óz deńgeıinde oıyn kórsetýge jol ashty. Olardyń barlyǵyn qaıtalap aıtyp jatpaı-aq qoıalyq. Qazaqstandyq taekvondoshylar qandaı jetistikke jetkenin jankúıerler jaqsy biledi. Osy oraıda federatsııa jáne bapkerler qoldaýy erekshe bolǵanyn aıta ketkenimiz artyq emes. Osyndaı qamqorlyq nátıjesinde biz kóptegen jarysta jeńis tuǵyrynan kórinip, elimizdiń týyn kókke kóterýge múmkindik aldyq. Mundaı tabystar aldaǵy ýaqytta jalǵasyn tabady degen senimdemin.
- Byltyr 21 jasqa deıingiler arasynda álem chempıony ataǵyn jeńip alǵanyńdy bilemiz. Dúbirli dodada saıystar qalaı ótti? Qandaı qarsylastaryńdy atap óter ediń?
- Ózderińiz biletindeı, dúnıejúzilik dúbirli doda 3-6 jeltoqsan aralyǵynda Kenııa astanasy Naırobı qalasynda ótti. Onda el namysyn 16 sportshy qorǵady. Álem chempıonatynyń qorytyndysy boıynsha Qazaqstan úzdik úshtiktiń quramyna endi. Eki altyn jáne bir qola medal jeńip alǵan ulttyq komanda jalpykomandalyq esepte úshinshi orynǵa turaqtap, tek Túrkııa men Iranǵa ese jiberdi. Onda menen basqa qazaqstandyq Beıbarys Qablan taekvondodan altyn júlde jeńip alsa, Tamerlan Tileýles taekvondodan Álem chempıonatynda qola medal ıelendi.
Qaı qarsylasymdy da ońaı boldy dep aıta almaımyn. Árbir jekpe-jekte tartysty báseke ótti. Barlyǵy júldeli orynnan kórinýge umtyldy. Men óz múmkindigimdi múlt jibermeýge tyrystym. Nátıjesin ózderińiz bilesizder, chempıondyq ataqqa qol jetkizdim.
Men fınalda kezdesken ırandyq Mohammad Alızadeni erekshe atap óter edim. Tájirıbeli sportshy óziniń sheberligin kórsetýge kúsh saldy. Qoldan upaı bermeıtinin bildirdi. Sondyqtan men bul jekpe-jekte úlken jaýapkershilikpen ótkize bildim. Dál soqqy sanyn arttyrýǵa nazar aýdardym. Nátıjesinde tóreshiler meniń jeńiske jetkenime qoldaý bildirdi. Osylaısha týǵan elime altyn medal syılaýǵa múmkindik alǵanyma qýanyshtymyn. Aldaǵy ýaqytta budan da bıik belesterdi baǵyndyrýǵa kúsh salatyn bolamyn.
- Alda qandaı jarystar kútip tur? Maqsatyń qandaı?
- Qashanda sportshy jeńis tuǵyrynan kóringendi qalaıdy emes pe? Bizdiń aldymyzda osyndaı mindetter tur. 2026 jyly qazaqstandyq taekvondoshylar kóptegen jarysqa qatysady. Olardyń barlyǵy jospar boıynsha júrgiziledi. Bıyl gran-prı jarystary ótedi. Odan keıin Azııa oıyndarynda synǵa túsemiz. Oǵan qosa Azııa chempıonatyn da esten shyǵarmaımyn. Qazaqstan 2027 jyly taekvondodan álem chempıonatyn ótkizýdi josparlap otyr. Jarysqa Kanada, Frantsııa, Úndistan, AQSh, Túrkııa jáne Qytaı sekildi 22 elden 750-den astam sportshy qatysady. Tatamıge olımpıada chempıondary men álemdik deńgeıdegi juldyzdar shyǵady. Onda qazaqstandyq sportshylar joǵary deńgeıde nátıjege qol jetkizemiz degen oıdamyn.
Al 2028 jyly AQSh-tyń Los-Andjeles qalasynda jazǵy Olımpıada oıyndary ótetini belgili. Árbir sportshynyń basty maqsaty – atalǵan dúbirli dodada jankúıer senimin aqtap, júldeli oryndardan kórine bilý.
Endigi kezekte sol maqsatta tynbaı ter tógemiz. Sheberligimizdi jetildirip, tájirıbemizdi arttyra túsýge kóńil bólemiz. Barlyq jeńis osyndaı eńbektiń arqasynda keletinin jaqsy uǵamyz.
- Áńgimeńe raqmet. Aldaǵy ýaqytta úlken tabystarǵa jete berýge tilektespin.
Aıta ketsek, 21 jasqa deıingiler arasynda álem chempıony atanǵan Beıbarys Qablan suhbatynda «Aldaǵy ýaqytta da Qazaqstan týyn jelbiretkim keledi» degen edi.
Al taekvondodan Qazaqstannyń 21 jasqa deıingi quramasynyń aǵa jattyqtyrýshysy Davran Razıev shákirtteriniń jetistigin joǵary baǵalaıtynyn atap ótti.