Taekvondodan álem chempıonatynda el namysyn kimder qorǵaıdy
NUR-SULTAN. QazAqparat - Taekvondodan 15-19 mamyr aralyǵynda Ulybrıtanııanyń Manchester qalasynda ótetin álem chempıonatynda el namysyn kimder qorǵaıtyny belgili boldy, dep habarlaıdy QazAqparat.
Reıtıngtik álem chempıonatyna el namysyn 16 sportshy (8 er, 8 áıel) qorǵamaq.
Erler arasynda 54 keli salmaqta Samat Temirhan, 58 kelide Eldos Ysqaq, 63 keli salmaq dárejesinde Eldar Birimbaı el namysyn qorǵasa, 68 kelide Nursultan Mamaev, 74 kelide Qaırat Sarymsaqov, 80 keli salmaqta Nurlan Myrzabaev synǵa túsedi. 87 keli salmaqta Smaıyl Dúısebaı jarys alańyna shyqsa, aýyr salmaq sanatynda (+87 keli) Rýslan Japarov júldeli oryndar úshin baq synaıdy.
Al áıelder arasynda eń jeńil salmaqta (46 keli) Aınur Lashbaı jarys alańyna shyqsa, 49 kelide Aınur Esbergenova, 53 kelide Farıza Aldońǵarovaǵa, 57 kelide Botagóz Qopanovaǵa úmit artylyp otyr. 62 keli salmaqta Fatıma Jaqsybaeva, 67 kelide Aqsáýle Erqasymova el namysyn qorǵamaq. 73 kelide Jansel Denızge senim artsaq, +73 salmaq sanatynda Mereke Júnisova el namysyn qorǵaıdy.
