Taekvondodan álem chempıonaty: Jansel Denız júldesiz qaldy

BAKÝ. QazAqparat – Ázerbaıjan astanasy Bakýde taekvondodan álem chempıonatynyń ekinshi jarys kúni aıaqtaldy. Jarys jolyna Ulttyq qurama sapynan Samırhon Ababakırov, Nuraı Qusaıynova men Jansel Denız shyǵyp, eshqaısy júldege qol jetkize almady, dep habarlaıdy QazAqparat.

QR Mádenıet jáne sport mınıstrligi Sportty damytý dırektsııasynyń baspasóz qyzmetinen málim etkendeı, tájirıbeli taekvondoshy Jansel Denız Grekııa quramasynyń 73 kg salmaqtaǵy kóshbasshy Anastasııa Delıdımıtrıs pen ıspanııalyq Belen Moran Romerony taza utyp, shırek fınalǵa shyqqan. ¼ kezeńde ol Polına Hannan (Reseı) jeńilip, júldege bir taban jetpeı toqtady.

Al 58 kg sanatyndaǵy Samırhon Ababakırov aljırlik Saıf Medjahed pen amerıkalyq Ýılıam Kannıngemnen ústem tústi. Ókinishke qaraı, qazaqstandyq sportshy 3-aınalymda osy salmaqtaǵy álem reıtınginiń kóshbasshysy, Tokıo Olımpıadasynyń kúmis júldegeri, týnıstik Muhammed Halıl Jendýbıdi jeńe almady.

67 kg dárejesindegi Nuraı Qusaıynova portýgalııalyq Mafalda Koelo men chehııalyq Iveta Jırankovany jeńip, básekeni senimdi bastady. Alaıda, shırek fınalda 2019 jylǵy álem chempıonatynyń qola júldegeri, jastar arasyndaǵy álem chempıony, frantsııalyq Magda Vıet-Enen aılasyn asyra almady.

Erteń jarys jolyna Nurlan Myrzabaev (80 kg), Smaıyl Dúısebaı (87 kg) men Botakóz Qapanova (49) shyǵady.

Jalpy bıylǵy dodaǵa 145 elden 1 myńǵa tarta taekvondoshy jınaldy. Bakýde ótip jatqan bıylǵy álem chempıonaty Halyqaralyq taekvondo federatsıasynyń 50 jyldyǵymen tuspa-tus kelip tur. Aldaǵy aptada munda Parıj Olımpıadasyna qajet upaılar sarapqa salynady. Bul sportta reıtıngi eń joǵary báseke – Olımpııa oıyndary (G20). Odan keıin álem chempıonaty (G14), Gran-prıdiń fınaly (G10) men Gran-prı sanatyndaǵy jarystar (G6) tur. Álem chempıony 140 ball alsa, kúmis júlde úshin – 84, qolaǵa 50 upaı beriledi.