Taekvondo: Túrkııadaǵy halyqaralyq týrnırge kimder barady
NUR-SULTAN. QazAqparat – 31 qańtar kúni Túrkııanyń Stambýl qalasynda taekvondodan ótetin halyqaralyq týrnırge qatysatyn qazaqstandyq sportshylardyń esimderi belgili boldy, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, atalǵan týrnırde Qazaqstannyń erler quramasy 5 salmaq dárejesi boıynsha synǵa túsedi. Al, áıelder eki salmaqta baq synaıdy.
Naqtyraq atap ótsek, 63 keli salmaqta Eldos Ysqaq pen Álimjan Serikbaev el namysyn qorǵasa, 68 keli salmaqta Eldar Birimbaı, 74 kelide Qaırat Sarymsaqov pen Les Ábdýsamat synǵa túsedi. 80 kelide Nurqanat Qojahmet pen Nurlan Myrzabaevqa senim artamyz. Al +87 keli salmaqta Smaıyl Dúısebaı men Rýslan Japarov synǵa túsedi.
Áıelder arasynda 49 keli salmaqta Farıza Aldońǵarovaǵa senim artylsa, 73 kelide Denız Jansel el namysyn qorǵaıdy.
Aıta keteıik, taekvondoshylarymyzdy bul jarystan keıin, taǵy naýryzda ótetin Azııa chempıonaty men sáýirde ótetin lıtsenzııalyq týrnır kútip tur.
Azııa birinshiligi Lıvannyń Beırýt qalasynda, lıtsenzııalyq týrnır Qytaıdyń Ýsı qalasynda uıymdastyrylmaq.
