Taekvondoshylar Parıjde nege jeńildi – bapkerdiń pikiri

PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda qazaqstandyq taekvondoshy Batyrhan Tóleýǵalı ekinshi aınalymda ıtalııalyq eki dúrkin álem chempıony Sımone Alessıodan jeńildi.

Jarystan keıin taekvondodan Qazaqstan komandasynyń aǵa jattyqtyrýshysy Nursultan Mamaev sportshylardyń aıqastaryna toqtalyp ótti.

«Birinshi jekpe-jegimizdi sátti bastap edik. Ekinshi aınalymda utylyp qaldyq. Kórip otyrǵandaryńyzdaı, Batyrhan Tóleýǵalı tym jas sportshy. Ol mundaı úlken arenalardy áli kórmegen. Jaqynda Sımone Alessıomen kezdesip, terezesi teń óner kórsetken bolatyn. Ókinishke qaraı, búgin ese jiberdi», - dedi jattyqtyrýshy Nursultan Mamaev.

Sondaı-aq, 58 kelide el namysyn qorǵaǵan Samırhon Ababakırov týraly da aıta ketti.

«Samırhon Ababakırov bul Olımpıadaǵa altyn alady dep kelgenbiz. Sebebi, onyń eń basty qarsylasy ıtalııalyq sportshy bolatyn. Sońǵy Olımpıadany, álem chempıonatyn, Eýropa birinshiligin jeńip alǵan atlet sol edi. Samırhondy jeńildi dep aıta almaımyn. Sońǵy sekýndtar ǵana sheship ketti. Onyń qalaı aıqasqanyn kórdińizder. Tájirıbesi de, sheberligi de joǵary. Bul jigitterdi kelesi Olımpıadaǵa daıyndaımyz», - dedi Mamaev.