Taekvondo sheberi, mergen, polıtsııa maıory – bir ózine bári de jarasady
-Darıǵa, polıtsııa qyzmetkeri atanýyńa ne sebep boldy?
- Bala kezimnen ofıtser bolýdy armandadym desem, artyq aıtqandyq emes. Terekti aýdany Prırechnyı aýylynda týyp-óstim. Sársenov aýylyndaǵy mektep tabaldyryǵyn attap, keıin qalaǵa kóshtik. Oraldaǵy №12 orta mekteptiń túlegimin.
- Jastaıyńnan taekvondomen aınalysyp, sport sheberi bolǵan ekensiń, qandaı bıikterdi baǵyndyrdym dep oılaısyń?
- Iá, qalaǵa kóshkennen keıin birneshe úıirmege jazyldym. Taekvondo, voleıbolmen aınalystym, mýzykaǵa den qoıdym. Atalǵan jekpe-jek túri óte unady. Eki aıdan keıin oblystyq jarysqa qatysa bastadym. Kóp uzamaı jasóspirimder arasynda el birinshiliginde úzdik úshtikke iliktim. 15 jasymda eresekter arasynda synǵa túsip, Qazaqstan chempıony ataǵyna qol jetkizdim. 2005 jyly ekinshi ret jeńis tuǵyryna kóterilip, sport sheberi boldym. Sol jyly attestatsııalaýdan ótip, І dan qara beldik ıegeri atandym. Álemdik deńgeıdegi jarystarda baq synaǵym kelgen. Degenmen 2006 jyly mektep bitirip, B.Bısenov atyndaǵy Qaraǵandy zań ınstıtýtynyń jedel izdestirý qyzmeti fakýltetine túskennen keıin sapaly bilim alýǵa basymdyq berdim. Sportty da umytqan joqpyn. Joǵary oqý ornyn úzdik támamdap, on jyl boıy krımınaldyq polıtsııada (qylmystyq izdestirý) jedel ýákil qyzmetin atqardym. Negizi bul – taza er adamdardyń isi. Psıhologııalyq tózimdilikpen qatar sportshy bolýym jedel mindetterdi oryndaýda septigin tıgizdi.
Qaraǵandydan Oral qalasyna aýysqannan keıin esirtki qylmysyna qarsy kúres basqarmasynda, ıývenaldy polıtsııada ter tóktim. Qazir oblystyq departamentte baspasóz qyzmetkerimin.
-Qyzmettesteriń seni quralaıdy kózge atqan mergen dep aıtady. Buǵan ne qosar ediń?
- Instıtýtta oqyp júrgende, atys daıyndyǵynan da óttim. Áýeli jaı qyzyǵýshylyq bolsa, keıin óz sheberlikterimdi jetildirip, túrli jattyǵýlardy oryndadym. Bul daǵdynyń keıin qyzmette paıdasy tıdi. Nysana kózdeýden ekinshi sporttyq razrıadym bar, birneshe ret kúshtik qurylymdar qyzmetkerleri arasynda oblystyq, respýblıkalyq jarystardyń júldegeri atandym. 2012 jyly Prezıdenttik kópsaıystan eldegi sala qyzmetkerleri arasynda úzdik úshtikke iliktim.
Bir qosarym, polıtsııa qatarynda óz kásibiniń bilgirleri ǵana emes, sonymen birge ataqty sportshylar, mýzykanttar, ózge de daryn ıeleri az emes. Men sonyń bireýi ǵanamyn.
-Aldaǵy maqsat-josparlaryń qandaı?
- Jalpy, arnaıy jasaqqa aýysqym keledi. Biraq qazirgi jumysym óte unaıdy. Bile bilgenge baspasóz qyzmeti de ońaı emes. Túrli aqparat quraldarymen baılanys ornatyp, polıtsııa qyzmetkerleriniń bedelin kóterýmen aınalysýdamyz. Al qańtar oqıǵasy kezinde erlermen qatar turyp, bir apta boıy úı kórmeýge týra keldi.
- Sóziń aýzyńda, Darıǵa, qos qarlyǵashyńdy tárbıeleýge ýaqyt tolyq jete me?
- Qazir, shúkir, qyzdarym ósip qaldy, ózime kómekshi. Olardy Otandy súıýge, adal da ádil bolýǵa, qaıyrymdylyqqa tárbıeleımin. Eń bastysy, ómirden óz oryndaryn taýyp, adam bolsa deımin. Óz júrgen jerimde sportty nasıhattap, salaýatty ómir saltyn ustanamyn.
Qazaq eline jańaryp-gúldenýdi, beıbit aspan, tynyshtyq tileımin.
- Áńgimeńe rahmet. Aldaǵy ýaqytta da tabystarǵa qol jetkize berýińe tilektespin.