Taekvondo: Qaırat Sarymsaqov álem chempıonatynyń qola júldegeri atandy
NUR-SULTAN. QazAqparat - Ulybrıtanııanyń Manchester qalasynda taekvondodan ótip jatqan álem chempıonatynda qazaqstandyq Qaırat Sarymsaqov qola júldeger atandy, dep habarlaıdy QazAqparat tilshisi.
Ulttyq olımpıada komıtetinen túsken málimetke qaraǵanda, jarystyń úshinshi kúni Qazaqstan quramasynyń kapıtany 74 kg salmaqta júldegerler qatarynan kórindi.
Birinshilikti qarqyndy bastaǵan Qaırat áýeli kosovolyq sportshyny 14:5 esebimen utty. Sodan keıin japonııalyq qarsylasyn 5:3 esebimen tize búktirdi. Úshinshi kezdesýinde portýgalııalyqty 10:7 esebimen jeńdi.
Shırek fınalda Q.Sarymsaqov aýstralııalyq taekvondoshydan 12:7 esebimen aılasyn asyrdy. Tek jartylaı fınalda ǵana ıordanııalyq, Rıo Olımpıadasynyń chempıony Ahmad Abýgaýshtan 3:7 esebimen utylyp qaldy.
Osylaısha Q.Sarymsaqov Qazaqstan quramasynyń qorjynyna alǵashqy júldeni saldy. 57 kg salmaqta synǵa túsken Botagóz Qapanova birinshi jekpe-jeginde marokkolyqqa ese jiberdi.
Qaırat 2017 jyly Ońtústik Koreıada ótken álem birinshiliginde de qola júldeger atanǵan bolatyn.
Taekvondo olımpıadalyq sport túri bolǵandyqtan, álemdik dodalarda sátti óner kórsetýdiń mańyzy zor.
