Taekvondo: Aıdana Súndetbaı Álem chempıonatynyń júldegeri boldy
NUR-SULTAN. QazAqparat – 7 tamyz kúni Ózbekstan astanasy Tashkentte taekvondodan kadetter arasyndaǵy álem birinshiligi bastaldy, dep habarlaıdy QazAqparat tilshisi.
QR Ulttyq Olımpıadalyq komıtetinen habarlaǵandaı, alǵashqy jarys kúni Qazaqstan qorjynyna bir qola medal tústi. Ony 33 keli salmaqta el namysyn qorǵap jatqan jetkinshegimiz Aıdana Súndetbaı jeńip aldy. Ol jartylaı fınalda qarsylasyna jol berip qoıdy.
Sonymen qatar, synǵa túsken sportshylar qatarynda 65 keliden joǵary salmaqta Islam Tursyn men 51 kelidegi Aımıra Ǵalymrashıdova úshinshi aınalymda jarys jolynan shyǵyp qalsa, Sabına Taıyrova men Almas Igilik birinshi kezeńde súrindi.
Aıta keteıik, 10 tamyz kúni máresine jetetin Álem chempıonatynda Qazaqstan sapynan áli 15 sportshy júldege talasady. Jarysqa 60 memleketten 550 taekvondoshy qatysyp jatyr.
