Tabysy eń tómengi kúnkóris deńgeıi shamasynan tómen halyq úlesi aǵymdaǵy jylǵy 1 toqsanda 6,6 paıyzdy qurady
ASTANA. Maýsymnyń 10-y. QazAqparat /Qanat Mámetqazyuly/ -12 myń úı sharýashylyǵyn iriktep zertteý qorytyndylary boıynsha eń tómengi kúnkóris deńgeıi shamasynan tómen tabysy bar respýblıka halqynyń úlesi aǵymdaǵy jylǵy 1 toqsanda 6,6 paıyzdy qurady. Bul kórsetkish 2009 jylǵy tıisti kezeńge qaraǵanda 4,5 paıyzdyq tarmaqqa tómen.
Statıstıka agenttiginiń málimetterine qaraǵanda, ómir súrý deńgeıiniń aımaqtyq aspektilerin qarastyra otyryp, Almaty, Astana qalalary men Pavlodar oblysy sııaqty aımaqtarda kedeıliktiń tómendeýin atap ótedi. Bul óńirler kórsetkishi respýblıkalyq deńgeıden 2 eseden astam tómen. Kedeıliktiń eń joǵarǵy deńgeıi bar aımaqtardyń qataryna Almaty, Qyzylorda jáne Mańǵystaý oblystary kirip otyr, bul kórsetkish ortasha respýblıkalyq deńgeıden 1,8 -1,6 esege asyp tústi.
Qalalyq jáne aýyldyq jerlerdegi tabystardyń edáýir saralanýy saqtalýda. 1 toqsanda aýyldyq jerdegi kedeıliktiń deńgeıi qalalyq deńgeıden 3 esege derlik asyp tústi. Degenmen, ótken toqsanmen salystyrǵanda bul alshaqtyq kedeılik kórsetkishiniń qalada 0,4 paıyzdyq tarmaqqa ósýi jáne aýyldyq jerde 0,3 paıyzdyq tarmaqqa ósýi esebinen azdap qysqardy.
Eń tómengi kúnkóris deńgeıi shamasynan tómen tabysy bar halyq úlesiniń edáýir tómendeýimen qatar, 1 toqsanda ótken jylǵy tıisti kezeńmen salystyrǵanda qorlar koeffıtsıenti de (0,5 tarmaqqa) tómendegen. Bul halyqtyń 10 paıyzy neǵurlym tómen jáne 10 paıyzy neǵurlym joǵary qamtamasyz etilgen toptary tabystarynyń alshaqtyǵynyń qysqarǵandyǵyn kýálandyrady.
