Tabystyń ósýi eksporttalatyn shıkizatqa baılanysty – UB

NUR-SULTAN. QazAqparat - Saýda balansynyń profıtsıti 9,9 mlrd AQSh dollaryn qurap, ótken jyldyń osy kezeńimen salystyrǵanda 6,3 mlrd AQSh dollaryna ósti. Bul týraly Ulttyq banktiń baspasóz qyzmeti habarlady.

Qazaqstan Ulttyq banki 2022 jyldyń birinshi toqsan qorytyndysy boıynsha tólem balansynyń aldyn ala baǵalaýyn qalyptastyrdy.

2022 jyldyń birinshi toqsanynda aǵymdaǵy shot 2,2 mlrd AQSh dollary mólsherinde profıtsıtpen qalyptasty (2021 jyldyń 1-toqsanynda aǵymdaǵy shottyń defıtsıti 1,6 mlrd AQSh dollaryn qurady).

Aǵymdaǵy shottyń teris saldosynyń oń aımaqqa aýysýy saýda balansy jaǵdaıynyń jaqsarýymen baılanysty.

«Saýda balansynyń profıtsıti 9,9 mlrd AQSh dollaryn qurap, ótken jyldyń osy kezeńimen salystyrǵanda 6,3 mlrd AQSh dollaryna ósti. Profıtsıttiń ósýi taýarlar eksportynyń ımporttan asyp túsetin ósý qarqynymen qamtamasyz etiledi.

Tólem balansy (TB) ádistemesi boıynsha taýarlar eksporty 7,6 mlrd AQSh dollaryna (+66,4%) ósip, 19,1 mlrd AQSh dollaryn qurady. Eksporttyń artýy eń aldymen munaı men gaz kondensatynyń álemdik baǵasynyń ósýine baılanysty. Tólem balansynyń ádistemesi boıynsha taýarlar ımporty 1,3 mlrd AQSh dollaryna (+17,0%) ósip, 9,1 mlrd AQSh dollaryn qurady.

Tikeleı sheteldik ınvestorlardyń kirisi 2,5 mlrd AQSh dollaryna (+53,3%) ósip, 7,0 mlrd AQSh dollaryn qurady. Bul rette kapıtalǵa qatysýdan túsken kiris 1,7 ese ósip, 6,4 mlrd AQSh dollaryn qurady. Tabystyń ósýi eksporttalatyn shıkizatqa álemdik baǵanyń ósýimen de baılanysty», - delingen habarlamada.