Tabystyń 1% ǵylymdy damytýǵa jumsaý talaptary saqtalmaýda - PhD doktoranty
«Prezıdent Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýyn qazirgi jahandyq qıyn jaǵdaıda sabyr saqtap, pandemııany jeńýge kúsh salǵan halyqqa alǵysymen bastady. Kún-tún demeı eńbek etken dárigerlerge, quqyq qorǵaý organdarynyń qyzmetkerlerine, eriktilerge, basqa da azamattarǵa rahmetin aıtyp, olardyń aıryqsha tabandylyqtyń jáne zor jaýapkershiliktiń jarqyn úlgisin kórsetkenderin jetkizdi. Budan Memleket basshysynyń árbir jaıttan habardar bolyp otyrǵanyn bilýge bolady», - dedi ol.
Jas ǵalymnyń paıymynsha, el basqarý, halyqtyń kóńilinen shyǵý ońaı is emes ekeni belgili. Qarapaıym halyqtyń únin estip, áleýmettik, ekonomıkalyq máselelerdi sheshýden basqa, shym-shytyryq syrtqy ister de jetip artylady. Kórshiles jatqan alyp memlekettermen dostyq qarym-qatynas ornatyp, elimizde tynyshtyq pen beıbitshiliktiń ornaýyn qamtamasyz etý árkimniń qolynan kele bermesi anyq.
«Mine, Memleket basshysy bul joly da birqatar problemany kóterip, onyń sheshimin tabýǵa tyrysýda. Ásirese, men úshin kókeıde júrgen nárse – «Jasyl» ekonomıkany damytý, qorshaǵan ortany qorǵaý máselesi alǵa qoıyldy. Bul problema búgingi kúnniń «jarasyna» aınalǵan. Elimizdegi ádemi, erekshe tabıǵatymen kózge túsken jerlerdiń qorǵaýsyz, jan-janýarlarymyzdyń «tepkige» qalǵany belgili. Mektepter men joǵary oqý oryndarynda ekologııalyq tárbıe jumystary da bastalyp ketken bolatyn. Bilim alýshylardyń ekologııalyq mádenıet, ekologııalyq bilim jáne tárbıe deńgeıin arttyrý úshin úzdiksiz bilim berýdiń keshendi modeli engiziletin bolady, dep otyr Bilim jáne ǵylym mınıstrligi de. Taǵy bir másele – balalardyń qaýipsizdigi men quqyǵyn qorǵaý kóterildi. Qoǵam ózgerip, burynǵy minez-qulyq normalary quldyraýǵa ushyrap, jasóspirimder arasynda devıantty minez-qulyq máselesi ózekti bolyp otyr. Sondyqtan quqyǵy qorǵalmaǵan, ar-namysy taptalǵan balanyń júıkesi tozyp, minez-qulqynyń ózgeriske ushyraıtyny aıtpasa da túsinikti. Keleńsiz jaıttardyń, jat qylyqtyń aldyn alý – memleket aldyndaǵy basty maqsat. «Jalpy, bizge áleýmettik saıasattyń jańa paradıgmasy kerek», – dep naqtylady Prezıdent. Sóıtip Úkimetke elimizdiń Áleýmettik kodeksin ázirleý jumysyn bastaý tapsyryldy», - deıdi PhD doktoranty.
Sonymen qatar, Aınur Turalyqyzy Joldaýda bilim sapasyn jetildirip, ǵylym salasyn damytý máselesi de tilge tıek etilgenin, ásirese, ǵylymdy qarjylandyrýdyń jáne qoldaýdyń mańyzdy kózi – iri kásiporyndardyń, ásirese shıkizat salasyndaǵy kompanııalardyń qarajaty ekeni aıtylǵanyn atap ótedi.
«Tapqan tabystyń 1 paıyzynyń ǵylym men tehnologııany damytýǵa jumsaýǵa tıisti talaptardyń saqtalmaı otyrǵanyn jetkizgen Memleket basshysy Úkimetke osy qarajatty jınaqtaý isin ortalyqtandyrýdy jáne onyń bıýdjet arqyly jalpyulttyq ǵylymı basymdyqqa saı bólinýin qamtamasyz etýdi tapsyrdy. Budan bólek aımaqtaǵy bıznes ókilderin joǵary oqý oryndaryndaǵy ǵylymı qyzmetin óz qamqorlyǵyna alyp, qoldaý kórsetýge shaqyrdy. Osy tusta elimizdi ǵylymı-tehnologııalyq turǵydan damytý boıynsha baǵdarlamalyq qujattyń qajettiligin de aıtyp ketti. Ǵylymı jumystarmen aınalysyp júrgen qyzmetkerler úshin bunyń oń úrdis bolary anyq», - dedi ol.
