«Tabysty osy jerden taýyp, shetelde shashý» ádetinen arylý kerek - Toqaev

ASTANA. QazAqparat – Prezıdent Qasym-Jomart Toqaev Úkimettiń keńeıtilgen keńesinde elge kásipkerlerdiń jańa býyny kerektýigin aıtty, dep habarlaıdy QazAqparat tilshisi.

«Memlekettiń qoldaýyna ıe bolyp otyrǵan iri bıznes ókilderi aıryqsha ról atqarady. «Tabysty osy jerden taýyp, shetelde shashý» ádetinen arylý kerek. Esesine, eldegi áleýmettik máselelerdi sheshýge kóbirek úles qosýǵa umtylǵan jón.

Іri kásipkerler Qazaqstanda tapqan tabysyn basqa jaqta emes, óz elimizdegi bıznesin damytýǵa jumsaǵany abzal. Jumysyn osy talapqa beıimdeı alǵan iri kásipkerler naǵyz ulttyq bıznes-elıtaǵa aınalady. Halyqtyń qurmetine bólenip, memlekettiń qorǵaýy men qoldaýyna ıe bolady», - dedi Memleket basshysy.

Qasym-Jomart Toqaev bul baǵytta elge tyń kúshter kerektigin basa aıtty.

«Sonymen qatar, bizge «kásipkerlerdiń jańa tolqyny» kerek. Memlekettiń resýrsyna arqa súıemeı, boıyndaǵy daryny men iskerligi arqyly turaqty ári myqty kásip qura bilgen «tyń kúshter» qajet», - dedi Prezıdent.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.