Úkimet pen ArcelorMittal arasyndaǵy mega-mámile: eki kompanııa $286 mln-ǵa satyldy
Ónerkásip jáne qurylys mınıstri Qanat Sharlapaev Úkimette ótken brıfıngte «ArselorMıttal Temirtaý» kompanııasyn Qazaqstan quzyretine alý kelissózderi qalaı ótkenin aıtyp berdi, dep habarlaıdy Kazinform.
Mınıstr bıylǵy tamyz aıynda el Prezıdenti Qasym-Jomart Toqaev «ArselorMıttal Temirtaý» AQ-da bolǵan apat kezinde kompanııanyń ınvestıtsııalyq jáne ózge de mindettemelerin óreskel buzǵany týraly aıtqanyn eske saldy. Sol kezde Memleket basshysy AMT-men ınvestıtsııalyq yntymaqtastyqty toqtatý jóninde tapsyrma bergen edi.
Bul ýaqytta Qazaqstan Úkimeti «ArselorMıttal Temirtaý» ıelerimen ArcelorMittal kompanııasyn metallýrgııalyq kombınat quramynan shyǵarý múmkindigi týraly kelissózder júrgizip jatqan. Kelissózder 2022 jyldyń 3 qarashasynda AMT enshiles kásiporny – Lenın atyndaǵy shahtada bolǵan qaıǵyly apattan keıin bastalǵan edi.
Qazaqstan Úkimeti «ArselorMıttal Temirtaý» kompanııasyna naqty talaptar qoıdy. Kelissózder nátıjesinde 2022 jylǵy 9 jeltoqsanda Qazaqstan Úkimeti men ArcelorMittal arasynda qazaqstandyq tarapqa kásiporyndy baǵalaý jáne aýdıt júrgizýge múmkindik beretin «Standstill Agreement» kelisimine qol qoıyldy.
«Kelissózder barysynda ArcelorMittal 3,5 mlrd dollar surady, bul halyqaralyq konsýltanttardyń esebine sáıkes kelmedi. Bul kelissózder protsesiniń uzaqqa sozylýynyń basty sebepteriniń biri boldy. Kásiporynnyń toqtap qalmaýy úshin kelissózderdi jedel ári jyldam júrgizý qajettiligi týyndady», — dedi Qanat Sharlapaev.
Onyń aıtýynsha, kelissózder protsesi 11 raýndtan turdy, nátıjesinde eki tarap ta ortaq ustanymǵa qol jetkizdi.
«Qazaqstan Úkimeti men «ArselorMıttal» arasyndaǵy kelisimdi mega-mámile dep ataýǵa bolady, onyń elimiz úshin mańyzy erekshe. «ArselorMıttal Temirtaý» jáne Aqtaý qubyr zaýytynyń qunyn 3,5 mlrd dollardan 286 mln dollarǵa deıin tómendettik. Mámileni júzege asyrýǵa memlekettik bıýdjetten bir de bir teńge jumsalǵan joq. Jańa ınvestor ArcelorMittal bas kompanııasynyń qysqa merzimdi jáne uzaq merzimdi mindettemeleri boıynsha jaýapkershilikti moınyna aldy. $286 mln – tolyq jumys istep turǵan eki kásiporynnyń quny», - dep túsindirdi mınıstr.
Aıta keteıik, búgin «ArselorMıttal Qazaqstannyń» jańa ınvestory anyqtaldy. Jańa ınvestor – qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń Dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar. Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.
Sondaı-aq, «ArselorMıttal Temirtaýdyń» ataýy «Qarmet» dep ózgerýi múmkin.
Kazinform agenttigi «ArselorMıttalTemirtaý» tarıhynda qandaı apattar bolǵanyna sholý jasaǵan edi.
