Tabysy tómen otbasylarǵa qoldaý: alty jylda 77 myńnan astam jaldamaly páter berildi

ASTANA. KAZINFORM — Úkimet tabysy tómen jáne áleýmettik osal sanattaǵy azamattardy turǵyn úımen qamtamasyz etýge baǵyttalǵan sharalardy jalǵastyryp jatyr. Bul týraly Ónerkásip jáne qurylys mınıstrliginiń málimetinde aıtylǵan.

2019–2024 jyldar aralyǵynda elimizde 77 357 jaldamaly páter salyndy jáne satyp alyndy.

Al 2025 jyldyń alǵashqy jartyjyldyǵynda bul kórsetkish 515 pátermen tolyqty.

- Memlekettik qoldaý tetikteriniń biri – «Otbasy bank» arqyly usynylatyn jeńildetilgen ıpotekalyq nesıeler. Atap aıtqanda, 2019 jyldan beri 2%-dyq mólsherlememen 22 022, 5%-dyq mólsherlememen 58 450 nesıe berilgen. 2025 jyldyń birinshi jartysynda taǵy 1 245 otbasy 2%-dyq, al 1 893 adam 5%-dyq ıpoteka rásimdedi, - dep jazdy mınıstrlikten.

Sonymen qatar, jeke turǵyn úı qurylysyna arnalǵan 183 500 jer telimi ınjenerlik ınfraqurylymmen qamtamasyz etildi.

Turǵyn úı-kommýnaldyq ınfraqurylymdy damytý jónindegi tujyrymdama 2029 jylǵa deıin júzege asyrylýda. Onyń aıasynda jaldamaly turǵyn úı salý, ıpotekany sýbsıdııalaý jáne JTQ úshin ınfraqurylym tartý baǵytynda qoldaý sharalary qarastyrylǵan.

Mınıstrliktiń habarlaýynsha, sońǵy alty jylda turǵyn úı qurylysyna 15,4 trln teńge jumsalsa, 2025 jyldyń alǵashqy alty aıynda salaǵa 1,5 trln teńge ınvestıtsııa tartylǵan.

Aıta keteıik, Aqtóbege kóship kelgen qandastardyń kóbi qalaǵa qonystandy.