Tabysy tómen qazaqstandyqtarǵa ıpotekaǵa shekteý qoıyla ma
ASTANA. KAZINFORM — Qarjy naryǵyn retteý jáne damytý agenttiginiń tóraıymy Mádına Ábilqasymova qazaqstandyqtardyń tabysy tómen bolsa, ıpotekaǵa shekteý qoıylý máselesine qatysty jaýap berdi.
Onyń aıtýynsha, jalaqy deńgeıine tikeleı shekteý engizý josparlanyp otyrǵan joq. Sheshimder táýekelderdi basqarý júıesi arqyly qabyldanady.
— Belgili bir sandyq shekteý engizý týraly sóz bolyp otyrǵan joq, ıaǵnı ol qaýlyda naqty belgilenbeıdi. Bul táýekelderdi basqarý júıesi arqyly júzege asyrylady. Bankter qaryz alýshynyń táýekel profılin, tabys deńgeıin baǵalap, soǵan qaraı sheshim qabyldaıdy, — dedi Mádına Ábilqasymova.
Ol sondaı-aq 2020 jyldan keıin paıyzdyq mólsherlemelerdiń ósýine baılanysty ıpoteka boıynsha merzimi ótken bereshektiń artqanyn atap ótti.
— Sondyqtan bankterge táýekelderdi basqarý júıesi aıasynda joǵary táýekelge ıe qaryz alýshylarǵa nesıe bermeý mindeti júkteledi, — dep túsindirdi ol.
Buǵan deıin Qazaqstanda ıpoteka mólsherlemesi bastapqy jarnaǵa baılanysty ózgeretinin jazǵanbyz.
