Tabys salyǵy: blogerler mıllıardtaǵan kirisin kórsete bastady
ASTANA. KAZINFORM – Tabysyn tómen kórsetip salyqtan jaltarǵan qazaqstandyq blogerler kirisin rastap, salyq tóleı bastady. Bul týraly Qarjy vıtse-mınıstri Erjan Birjanov málim etti.
- Búginde 50-den astam bloger 2,5 mıllıard teńgeden astam kirisin kórsetti. Olar boıynsha salyq tólendi. Qalǵandary boıynsha áli ýaqyt bar, 30 jumys kúni berildi. Naýryz aıynyń sońyna deıin tekserý júrgizip, aqparatty usynamyz, - dep qysqa qaıyrdy Erjan Birjanov Májilistiń jalpy otyrysynan keıin BAQ ókilderiniń saýalyna jaýap bere turyp.
Aıta ketsek, aqpannan bastap Memlekettik kirister komıteti tabysyn tómen kórsetken 594 blogerge qatysty 53,3 mlrd teńgeniń habarlamasyn jibere bastady. Tekserý, salystyrý qorytyndysy boıynsha 594 tulǵanyń tabysynda 53,3 mlrd teńgege sáıkessizdik anyqtalǵan.
Keıin Memlekettik kirister komıteti keıbir blogerlerge jibergen tabys salyǵyn tóleý týraly habarlamasyn qaıtaryp aldy.
Sondaı-aq álem elderinde blogerler qandaı salyq tóleıtini týraly sholý jasaǵan bolatynbyz.