Tabys deklaratsııasyn tapsyrýdyń tártibi ózgeredi
ASTANA. KAZINFORM –Qarjy mınıstriniń orynbasary Erjan Birjanov Úkimet otyrysynan keıin ótken baspasóz máslıhatynda tabys deklaratsııasyn tapsyrýdyń tártibi ózgeretinin aıtty.
- Májiliste siz aldaǵy 5 jyldyń kóleminde mindetti tabys deklaratsııasy qoldanystan alynýy múmkin ekenin málimdedińiz. Onyń alǵashqy qadamy tabys deklaratsııasyn aldyn ala avtomatty túrde toltyrý rejımin engizý bolatynyn aıttyńyz. Bul búkil azamattardyń tabys deklaratsııasynan bas tartasyzdar degen sóz be? - dep surady jýrnalıst.
Erjan Birjanov Qarjy mınıstrliginiń nemese Qazaqstan Úkimetiniń jeke qalaýy emes ekenin, álemdegi tájirıbe osylaı oıysyp jatqanyn aıtty.
- Jańa Salyq kodeksinde deklaratsııany aldyn ala avtomatty túrde toltyrý elementi qarastyrylǵan. Kelesi jyldan bastap shaǵyn bızneske osyndaı múmkindik usynamyz. Ári qaraı osy fýnktsııanyń aıasyn keńeıte beremiz. Al iri bıznespen «kóldeneń monıtorıng» jobasyn qolǵa alǵanbyz. Іri bıznes bizge ishki esepteriniń bárin, qujattaryn tapsyrady. Sol arqyly búkil deńgeıdegi operatsııalardyń mazmunyn túgel kóre alamyz. Osynyń arqasynda deklaratsııa tapsyrýdyń qajeti de bolmaı qalady. Qazir bıznespen jobany salyq tóleýshilerdiń basqa sanattaryna da qoldaný baǵytynda jumys istep jatyrmyz. Eger bári tsıfrlyq formatta bolsa, onlaın qujat almasýdy jolǵa qoıa alsaq, deklaratsııa tapsyrýdyń qajeti ózdiginen joıylady, - dedi Erjan Birjanov.
Sondaı-aq, ol aldyn ala toltyrylǵan deklaratsııany salyq tóleýshige memlekettik kirister qyzmetiniń ózi usynatynyn aıtady.
- Biz basqa memlekettik organdardan, uıymdardan derekter jınap, salyq tóleýshiniń ózine kórsetemiz. Bul bir qyzmettiń túri deýge de bolady. Salyq tóleýshi osy aldyn ala toltyrylǵan deklaratsııanyń rastyǵymen kelise de alady, túzete de alady. Bul jerde biz salyq tóleýshiniń rólin ózimizge tolyq alamyz, keıin ol deklaratsııa ózgertilmeıdi degen sóz emes. Salyq tóleýshi «joq, myna kórsetilgendi tabys dep eseptemeımin» dep te aıta alady. Osylaı túzetý engize alady, - dedi vıtse-mınıstr.
Buǵan deıin ol jyl sońyna deıin saıası qyzmetshiler salyq deklaratsııalaryn jarııalaıtynyn aıtqan edi.