Tabıǵı jáne tarıhı nysandardy búldirgenderge qandaı jaza qoldanylady
ASTANA. KAZINFORM – Áleýmettik jelilerde tanymal bolý maqsatynda tabıǵı jáne tarıhı eskertkishterge zııan keltirý oqıǵalary kóbeıdi. Osy rette Іshki ister mınıstrligi Qazaqstannyń mádenı jáne tabıǵı murasyna zalal keltirgender zań boıynsha jaýapkershilikke tartylatynyn eske saldy.
Tabıǵı eskertkishter, qoryqtar, ulttyq parkter jáne tarıhı nysandar Qazaqstan Respýblıkasynyń ulttyq baılyǵy retinde memleket qorǵaýynda tur. Jartastarǵa, eskertkishterge jáne basqa da mádenı jáne tabıǵı obektilerge jazý jazý nemese olardy búldirý zańsyz sanalady. Mundaı quqyq buzýshylyqtar úshin jaýapkershilik qarastyrylǵan. Qazaqstan Respýblıkasy Qylmystyq kodeksiniń 294-babyna sáıkes (Vandalızm), memleket qorǵaýyndaǵy obektilerdi búldirgeni úshin 100-den 2 000 AEK-ke deıin aıyppul salý, qoǵamdyq jumystarǵa tartý, 50 táýlikke deıin qamaý, bas bostandyǵyn shekteý nemese úsh jylǵa deıin bas bostandyǵynan aıyrý jazasy qoldanylýy múmkin.
Іshki ister mınıstrligi óz eline, onyń tabıǵaty men tarıhyna qurmetpen qaraý ár azamattyń mindeti ekenin eske salady. Vandalızmniń kez kelgen túri zańmen qatań jazalanady, sebebi qoǵamdaǵy tártip pen zańdylyq ár adamnyń jaýapkershiligine negizdelgen.
Eske sala keteıik, buǵan deıin «Báıterekke» qurmetsizdik tanytqan astanalyq qamaýǵa alyndy.
