Tabıǵı resýrstarǵa táýeldilikten birtindep arylýymyz qajet – Prezıdent maqalasy

ASTANA. KAZINFORM – Prezıdent Qasym-Jomart Toqaev «Egemen Qazaqstan» gazetine jarııalaǵan «Ortalyq Azııa renessansy: ornyqty damý jáne órkendeý joly» atty maqalasynda óńirdegi yqpaldastyqty tereńdetýdiń tyń baǵyttaryn ataıdy.

«Elderimizdiń jalpy aýmaǵy – 3 882 000 sharshy shaqyrym, halqynyń sany 80 mıllıonnan asady. Al ishki jalpy ónimi 450 mıllıard dollarǵa jýyqtaıdy. Álemdegi ýran qorynyń shamamen 20, munaıdyń 17,2, tabıǵı gazdyń 7 paıyzy – bizdiń aımaqtyń enshisinde. Ortalyq Azııa kómir óndirýden álemde 10-shy, elektr energııasyn óndirýden 19-orynda tur. Bizdiń ekonomıkalarymyz birin-biri tolyqtyryp otyrady. Bul jaǵdaı elderimizdiń syrtqy faktorlarǵa laıyqty tótep berýin qamtamasyz etip, saýda-óndiris salasyndaǵy tsıklderdi ártaraptandyrýǵa múmkindik beredi. Birlesken ekonomıkalyq jobalardy tıimdi iske asyrý osy úderiske oń yqpal ete alady», - dep jazady Qasym-Jomart Toqaev.

Memleket basshysy ekonomıkany tehnologııalyq jaǵynan damytý óńir elderiniń basty mindeti dep esepteıdi.

«Biz tabıǵı resýrstarǵa táýeldilikten birtindep arylýymyz qajet. Osy rette medıa, kıno, mýzyka, dızaın, bilim berý jáne aqparattyq tehnologııalar salasyn qamtıtyn kreatıvti ındýstrııa men tsıfrlandyrý isi ekonomıkaǵa tyń serpin beretin kúshke aınala alady. Óńir elderiniń osy baǵytta birlesken jobalar ázirleýge áleýeti de jetedi. Tsıfrlyq jáne kreatıvti ındýstrııanyń jappaı qarqyn alýy shıkizatqa súıengen ekonomıkadan zııatkerlik sıpattaǵy óndiriske dáıekti túrde kóshýge yqpal etetin bolady. Ortalyq Azııanyń yqpaldastyǵy bizdiń elderimizdiń ulttyq ekonomıkalyq ósiminiń basty sebepshisi bolmaǵanymen, onyń negizgi qaınar kóziniń biri bola alatynyna senimdimin», - deıdi Prezıdent.