Tabıǵı órtti aldyn alýǵa tehnıka saı ma
ASTANA. KAZINFORM – Elimizde sý tasqyny qaýpi joıylyp, endigi jerde tabıǵı órtterdi aldyn alýǵa basa nazar aýdarylyp jatqanyn atap ótken jón. Bıyl órttiń qaýipti kezeńi bastalǵannan beri 33 orman órti tirkelgen.
Bul — ótken jyldyń sáıkes kezeńimen salystyrǵanda 4,4 ese az. QR Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Marǵulan Amanbaev Ortalyq kommýnıkatsııalar qyzmetialańynda ótken brıfıngte bul baǵyttaǵy jumystarǵa toqtaldy.
Óńtústik óńirlerde órttiń qaýipti kezeńi 20 naýryzdan, al soltústik, batys, shyǵys jáne ortalyq bólikterde 8 sáýirden bastalǵan. Tótenshe jaǵdaılar mınıstrligi halyqtyń qaýipsizdigin qamtamasyz etý maqsatynda órt qaýipsizdigi kúsheıtýge baǵyttalǵan sharalar keshenin qabyldaýǵa kirisken.
«Ár óńirde iri órttermen kúresý úshin tıisti jumystar atqarylyp jatyr. Jalpy, el boıynsha 50 myń adam jáne 10 myńnan astam tehnıka daıyn. Qazavıaqutqarý avıatsııasynyń 19 borty turaqty daıyndyq rejıminde tur, onyń 9-y sý tógetin qurylǵylarmen jabdyqtalǵan. Ótken jyly sý tógetin qurylǵylary bar TJM borty 14 tabıǵı órtti sóndirýge qatysty, jalpy massasy 5 700 tonna sý bolatyn 1 900-dan astam tsıkl oryndaldy. Qazirgi tańda aerovızýaldy barlaý úshin 120 dron bar. Sondaı-aq, «Orman qoryn kúzetý jáne qorǵaý qyzmeti» jańa respýblıkalyq azamattyq qorǵaý qyzmeti quryldy», – dedi ol.
Memlekettik órtke qarsy qyzmet bólimsheleri joq eldi mekenderdegi jáne dala aýmaǵyndaǵy órtterdi joıý úshin erikti órtke qarsy quralymdary tartylmaq. El aýmaǵynda barlyǵy 241 erikti órtke qarsy quralymdary qurylǵan. 2289 komanda bar. Budan bólek, ákimdikter memlekettik órtke qarsy qyzmeti joq eldi mekenderdi qorǵaý úshin órt sóndirý beketterin qurýǵa tıis. Búgindk respýblıkada 720 órt sóndirý beketi qurylǵan.
