Tabıǵı monopolııalardy retteý agenttiginiń Jaýapty hatshysy shartty túrde 2 jylǵa bas bostandyǵynan aıyryldy
ASTANA. 18 qańtar. QazAqparat /Aıdar Ospanalıev/ - Tabıǵı monopolııalardy retteý agenttiginiń Jaýapty hatshysy Aleksandr Konoplıanyı shartty túrde 2 jylǵa bas bostandyǵynan aıyryldy. Bul týraly búgin 2010 jyldyń qorytyndylaryna baılanysty jýrnalıstermen kezdesken Astana qalalyq Ekonomıkalyq qylmysqa jáne sybaılas jemqorlyqqa qarsy kúres departamentiniń baspasóz hatshysy Tolqyn Nábıeva málim etti.
Onyń sózine qaraǵanda, osy ýaqytta A.Konoplıanyı men «Baqyt» kompanııasy» jaýapkershiligi shekteýli seriktestiginiń prezıdenti B.Ibraev pen onyń orynbasary E.Ormanovqa qatysty qylmystyq isti tekserý aıaqtaldy. «A.Konoplıanyı óziniń qyzmettik ókilettigin asyra paıdalana otyryp, «Baqyt-kompanııasy» JShS-nyń ókilderimen birlesip, atalmysh kompanııanyń lıtsenzııa sharttary buzylǵan janar-jaǵar maıdy saqtaý men satý arqyly kásipkerlik jumystarynyń alǵa basýyna yqpal etti. Osyǵan qaraı B.Ibraev pen E.Ormanovqa «memleket ıelegine jatatyn jerden zańsyz túrde óz erkimen maı quıý stansasyn ashyp aldy. Sondaı-aq zańdastyrylǵan maı quıý stansalaryn paıdalanýǵa berý jónindegi qabyldaý aktileri boıynsha jalǵan sheshim shyǵaryp, qylmystyq jolmen tabylǵan múlikti kásipkerlik maqsatqa paıdalandy, kásipkerlik qyzmetti lıtsenzııalaý talaptaryn buza otyryp júzege asyrdy. Nátıjesinde 1,3 mıllıard teńge kóleminde qarjy tapty» - degen aıyp taǵyldy», - dedi baspasóz hatshysy.
Onyń málimetteri boıynsha, Konoplıanyıdyń osyndaı qylmystyq áreketteriniń arqasynda jaýapkershiligi shekteýli seriktestik ókilderi ekologııalyq talaptardy buzý arqyly turǵyndardyń ómirine qaýip tóndire otyryp, Astanadaǵy 12 maı quıý stansalaryn óz maqsattaryna paıdalanǵan. «Al odan kelgen tabys 1,3 mıllıard teńgeni qurady. Osyǵan baılanysty A.Konoplıanyı 2 jylǵa shartty túrde bas bostandyǵynan aıyrylyp, B.Ibraev pen E.Ormanovqa aıyppul salyndy», - dedi baspasóz hatshysy.
