Tabıǵı monopolııalardy retteý agenttiginiń jaýapty hatshysy A. Konoplıanyıǵa qatysty qylmystyq is sotqa tapsyryldy

Bul týraly búgin elordada ótken baspasóz máslıhaty barysynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

«Qazaqstan Respýblıkasy Tabıǵı monopolııalardy retteý agenttiginiń jaýapty hatshysy A.Konoplıanyıǵa, «Kompanııa-Baqyt» JShS-niń prezıdenti Ibraev pen onyń orynbasary Ormanovqa qatysty qylmystyq is sotqa tapsyryldy», - dedi resmı ókil.

Onyń aıtýynsha, Ibraev pen Ormanovqa memleket menshigindegi jerdi janar-jaǵar maı stansylaryn salý jolymen basyp aldy, zańdastyrý týraly jalǵan sheshimderdi jáne zańdastyrylǵan janar-jaǵar maı stansylaryn qabyldaý týraly jalǵan aktilerdi jasady, qylmystyq jolmen alynǵan múlikti kásipkerlik qyzmette paıdalandy jáne kásipkerlik qyzmetti lıtsenzııa sharttaryn buzýmen júzege asyryp, 1,3 mlrd. teńge zańsyz tabys aldy degen aıyp taǵylǵan. Al A.Konoplıanyı bolsa bılikti jáne laýazymdyq ókiletterin asyra paıdalaný jolymen «Astana Baqyt» JShS-ne janar-jaǵar maı materıaldaryn saqtaý jáne satý boıynsha kásipkerlik qyzmetti lıtsenzııa sharttaryn buzýmen júzege asyrýǵa kómektesken.

«A.Konoplıanyıdyń qylmystyq is-áreketi nátıjesinde JShS lıtsenzııanyń qosymshasyn zańsyz alǵan. Ekologııalyq talaptardy buzǵan. Sonymen qatar turǵyndardyń qaýipsizdigine qater tóndire otyryp, 12 janar-jaǵar maı stansysyn paıdalanǵan jáne 1,3 mlrd. teńge zańsyz tabys alǵan» - dedi M.Jumanbaı.