Tabıǵı monopolııalardy retteý agenttiginiń eks-basshysy M. Ospanov 1,1 mlrd. teńge aıyppul tóledi
ASTANA. QazAqparat - Tabıǵı monopolııalardy retteý agenttiginiń eks-basshysy Murat Ospanov 1 mlrd. 101 mln. 60 myń teńge kóleminde aıyppul tóledi, dep habarlady Astana qalalyq sotynyń baspasóz qyzmeti.
«2015 jylǵy 12 qazandaǵy jaǵdaı boıynsha sottalǵan M. Ospanov memlekettiń paıdasyna aıyppuldyń tolyq somasyn tóledi. Osylaısha Ospanov negizgi jazasyn tolyq ótedi»,- delingen habarlamada.
2015 jyly 12 qazanda sottalýshy M.Ospanovqa qatysty atqarý óndirisi toqtatyldy.
Eske sala keteıik, aǵymdaǵy jyly 13 aqpanda Astana qalasynyń qylmystyq ister jónindegi mamandandyrylǵan aýdanaralyq sotynyń úkimimen Murat Ospanov sottaldy. Qylmystyq zańnamany izgilendirý jónindegi júrgizilip jatqan memleket saıasatyna sáıkes M.Ospanovqa 1 mıllıard 101 mıllıon 60 myń teńge kóleminde aıyppul salý túrinde jaza taǵaıyndaldy.
Sonymen qatar sot M. Ospanovqa tıesili múlikti tárkiledi, sondaı-aq kassatsııalyq sot kollegııasy oǵan qatysty úkimniń qosymsha jazasy bóligin ózgertti. Atap aıtqanda, kassatsııalyq sottyń sheshimimen ol 7 jylǵa memlekettik qyzmetti atqarý jáne jergilikti ózin ózi basqarý organdarynda qyzmet atqarý quqyqtarynan aıyryldy.
