Tabıǵı monopolııa sýbektileriniń ınvestıtsııalyq mindettemelerdi oryndaýyna keshendi tekserý júrgiziledi
ASTANA. KAZINFORM - 2026 jyldyń ekinshi toqsanynan bastap tarıfterdi kóterý ınflıatsııanyń targettelgen deńgeıimen baılanysty teńdestirilgen túrde júzege asyrylady. Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Inflıatsııa deńgeıin baqylaý jáne tómendetý jónindegi sharalar kesheni tutynýshylyq kredıtteýdiń ósýin tejeýge baǵyttalǵan aqsha-kredıt jáne makroprýdentsıaldyq saıasat sharalarymen tolyqtyrylady. Munyń bári ınflıatsııany turaqtandyrýǵa jáne báseńdetýge yqpal etedi. 2026 jyldyń 1 toqsanynyń sońyna deıin barlyq tutynýshy toptary úshin kommýnaldyq tarıfterdiń ósýi toqtatyldy. Tarıfterdi kóterýge moratorıı qoldanylý kezeńinde tabıǵı monopolııa sýbektileriniń ınvestıtsııalyq mindettemelerdi oryndaýyna keshendi tekserý júrgiziledi, - dedi vıtse-premer.
Onyń aıtýynsha, 2026 jyldyń ekinshi toqsanynan bastap tarıfterdi kóterý ınflıatsııanyń targettelgen deńgeıimen baılanysty teńdestirilgen túrde júzege asyrylady.
- Halyqtyń osal toptary úshin ataýlylyq baǵytyn kúsheıtip jáne ony asa muqtaj sanattarǵa kórsete otyryp, turǵyn úı kómegin kórsetý tetigi saqtalady. 2026-2028 jyldary turǵyn úı-kommýnaldyq sharýashylyq ınfraqurylymyn jańǵyrtý boıynsha 30 myń shaqyrym ınjenerlik jelilerdi jóndeý úshin shamamen 3 trln teńge ınvestıtsııa tartý josparlanyp otyr. Tabıǵı monopolııalar sýbektileri qyzmetterine tarıfterdiń ınflıatsııaǵa jyl saıynǵy salymy 1,0 paıyzdyq tarmaqtan aspaıdy, - dedi Serik Jumanǵarın.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.