Tabıǵı monopolııa sýbektilerine 900 mln teńgege jýyq aıyppul salyndy
ASTANA. KAZINFORM – Qazaqstanda 2022 jyldan beri 22,7 myń shaqyrym ınjenerlik jeli jóndeldi. Bul týraly QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev málim etti.
Onyń aıtýynsha, tarıftik saıasattyń negizgi maqsaty – tutynýshylardyń múddesi men tabıǵı monopolııa sýbektileriniń qajettilikteri arasyndaǵy teńgerimdi saqtaý.
– 2023 jyldan bastap «Tarıfti ınvestıtsııaǵa aıyrbastaý» baǵdarlamasy iske asyrylyp keledi. Bul jumysqa aıtarlyqtaı serpin berip, atqarylǵan jumystardyń kólemi eki esege artty, – dedi Tımýr Qosymbaev.
Komıtet tóraǵasynyń málimetinshe, 2022 jyldan beri sýmen jabdyqtaý, sý burý, elektrmen jabdyqtaý jáne jylýmen jabdyqtaý jelilerin qosa alǵanda, jalpy uzyndyǵy 22,7 myń shaqyrym ınjenerlik ınfraqurylym jóndelgen. Sonyń nátıjesinde jelilerdiń tozý deńgeıi jyl saıyn shamamen 3 paıyzǵa tómendep keledi.
Tutynýshylardyń quqyǵyn qorǵaý maqsatynda tabıǵı monopolııa sýbektileriniń qyzmetine qatań baqylaý júrgizilip jatyr.
- Óz mindettemelerin oryndamaǵan sýbektilerge qatysty jalpy somasy 14 mlrd teńgeni quraıtyn ýaqytsha ótemaqylyq tarıfter engizildi. Sonymen qatar jylýmen jabdyqtaý qyzmetteri boıynsha jyl saıyn qaıta esepteý júrgiziledi. 2025 jyldyń qorytyndysy boıynsha onyń kólemi 1,6 mlrd teńgeni qurady. Budan bólek, shamamen 900 mln teńge kóleminde ákimshilik aıyppul salyndy, – dedi komıtet basshysy.
Ol tarıftik saıasat halyqqa túsetin qarjylyq júktemeni barynsha azaıtý qaǵıdaty negizinde júzege asyrylyp jatqanyn atap ótti.
- Tarıfterdiń ózgerýi kezeń-kezeńimen jáne teńgerimdi túrde júrgiziledi. Sonymen qatar áleýmettik mańyzy bar azyq-túlik taýarlaryn óndirýshilerge qoldaý kórsetilip, olar úshin belgili bir jeńildikter qarastyrylǵan, – dedi Tımýr Qosymbaev.
Aıta keteıik, tabıǵı monopolııa sýbektileri 2 jylda 44 mlrd teńgeni maqsatsyz jumsaǵan.
