Tabıǵı kún ýaqyty onkologııalyq aýrýdyń aldyn alýǵa kómektesedi — Dılıara Qaıdarova

ALMATY. KAZINFORM —Halyqaralyq zertteýler onkologııalyq aýrýlardyń aldyn alý úshin tabıǵı kún ýaqytyn saqtaý qajettiligin dáleldeıdi. Bul týraly elimizdiń bas onkology Dılıara Qaıdarova «Biryńǵaı ýaqyt beldeýi: ǵylymı aspektiler» dóńgelek ústelinde aıtty. 

Onyń aıtýynsha, 2017 jyly AQSh ǵalymdary «Ýaqyt beldeýindegi boılyq jaǵdaıy jáne Amerıka Qurama Shtattarynda qaterli isik qaýpi» atty zertteýlerin jarııalady.

AQSh-tyń 600 okrýgindegi 4 mıllıon turǵynǵa zertteý júrgizildi. Nátıjıe mynandaı: Shyǵystan batysqa qaraı ýaqyt beldeýleri boıynsha kún ýaqytynan árbir 5 gradýs ozý qaterli isik qaýpin shamamen 10% arttyratynyn kórsetti.

– Kún ýaqytynan buryn ýaqyt beldeýi jáne kún shyqqanǵa deıin oıaný qaterli isik aýrýlarynyń sanyn kóbeıtedi. Kún shyqqanǵa deıin oıaný sút bezi men qýyq asty beziniń qaterli isiginiń sanyn 4%-ǵa, leıkemııany shamamen 12%-ǵa, jatyrdyń qaterli isigin 10%-ǵa arttyrady. Osylaısha, halyqaralyq zertteýler onkologııalyq aýrýlardyń aldyn alý úshin tabıǵı kún ýaqytyn saqtaý qajettigin dáleldeıdi, - dedi Dılıara Qaıdarova.

Dúnıejúzilik ýaqytty úılestirý shkalasyna sáıkes (aǵylsh. Coordinated Universal time) – UTC+5 – Almaty, Astana, Shymkent, Qaraǵandy, Semeı, Taldyqorǵan sııaqty Qazaqstannyń kóptegen iri qalalary úshin tabıǵı ýaqyt beldeýi, ıaǵnı tabıǵı ýaqyt.

Onkologtyń pikirinshe, halyqtyń densaýlyǵy úshin tabıǵı kún ýaqytyna jaqyn turaqty tabıǵı ýaqyt beldeýlerin qoldanǵan durys.

Osyǵan deıin, Ǵylym jáne joǵary bilim mınıstrligi zertteý algorıtmin túsindirgen edi. 

Budan buryn habarlanǵandaı, bıyl qarasha aıynda Qazaqstanda biryńǵaı ýaqyt beldeýiniń adamdarǵa áseri zertteletini málim boldy. 

Ýaqyt beldeýin zertteýge shamamen 160 mln teńge jumsalmaq.