Tabıǵı gazdy shalǵaı jatqan aýyldarǵa jetkizýge bolady - U.Qarabalın

ASTANA. 9 qazan. QazAqparat - Bolashaqta tabıǵı gazdy shalǵaı jerde jatqan mekenderge jetkizýge bolady. Búgin «KAZENERGY» qaýymdastyǵynyń VIII Eýrazııalyq forýmy aıasynda jastardyń saýaldaryna jaýap bergen QR Munaı jáne gaz mınıstri Uzaqbaı Qarabalın osylaı aıtty.

«Búginde gaz propan-býtan retinde jetkiziledi. Al qazirgi jańa tehnologııalardyń negizinde tabıǵı gazdy da alys jerlerge tasymaldaýǵa bolady. Árıne, ony kóptep jetkize almaısyń. Degenmen, sonyń ózi ájeptáýir jylý men energııany bere alady. Menińshe, bul másele Qazaqstan úshin asa mańyzdy. Sebebi bizdiń elimizde shalǵaı jatqan aýyldy mekender kóp. Olardyń birazy negizgi gaz qubyrlarynan alys jerde ornalasqan. Sondyqtan aldaǵy ýaqytta san alýan tehnologııalyq máselelerdi sheshýdiń arqasynda tabıǵı gazdy shalǵaı jatqan aýyldarǵa jetkizýge bolady. Bul mindetti qazirgi jastar abyroımen atqara alady dep oılaımyn», - dedi U.Qarabalın.