Tabıǵı apattan qorǵaný is-qımyldaryn qaıta qaraý kerek - depýtat

ASTANA. KAZINFORM – Búgin Májilistiń jalpy otyrysynda depýtat Baqytjan Bazarbek jerasty qazynany óndirip jatqan óńirlerde zilzala qaýpi joǵary ekenin aıtty.

«Zilzala – aıtyp kelmeıtin apat. Sondyqtan bizdiń el oǵan daıyn ba?! Bile bilseńizder, bul úlken adam shyǵynyna ákeletin qaýip-qater. Sondyqtan oǵan árkez saqadaı saı daıyn bolǵan jón. Buǵan keshe Almatyda bolǵan jaǵdaıdy mysal retinde aıtýǵa bolady. Almatylyqtar oryn alýy múmkin jerasty dúmpýi týraly habarlama almady. Turǵyndar basynda ábigerge tústi. Boıyn úreı bılegen halyq japatarmaǵaı syrtqa umtyldy. Tipti, kópqabatty úılerdiń terezesinen sekirýge deıin bardy. Kólikterimen qala syrtyna shyǵyp ketpek bolǵandarda esep joq. Onyń sońy uzynsonar kepteliske ulasty. Bul – elimizdiń eń úlken qalasy, jan-jaqty damyǵan, ınfraqurylymy myqty Almatydaǵy jaǵdaı.

Abyroı bolǵanda, ǵımarattar qulamady, adam shyǵyny joq. Dese de, mundaı jaǵdaıdyń qaıtalanbasyna kim kepil?! Ásirese, elimizdiń taýly aımaqtarynda, jerasty qazynany óndirip jatqan óndiristi óńirlerde zilzala qaýpi joǵary», - dedi B. Bazarbek Úkimet basshysy Álıhan Smaıylovtyń atyna joldaǵan saýalynda.

Onyń paıymynsha, Tótenshe jaǵdaı mınıstrligi men basqa da tıisti mekemelerdiń zilzaladan qorǵaný boıynsha jumystaryn muqııat qaıta qaraǵan jón. Sonymen birge, turǵyndar arasynda da zilzaladan qorǵaný sharalary boıynsha oqý-jattyǵý jumystaryn júıeli túrde júrgizý kerek.

«Feık aqparattarǵa sengish halyqty qorqynysh bıledi. Barlyq jaǵdaı da ótirik aqparat tez tarap ketetini bar. Azamattar tek resmı aqparatty ala bilýi qajet, árbir taraǵan materıaldy jan-jaqty tekserýimiz kerek. Sol úshin, bizde apatqa daıyn bolatyndaı mádenıet qalyptasýy tıis», - dedi depýtat.

Onyń aıtýynsha, jerdiń tektonıkalyq qyrlary jatqan aımaqtarda, sondaı-aq topyraq kóshkini qaýpi bar aýmaqta jer ýchaskelerin berýge zańnamalyq tyıym salýdy engizý kerek.