Tabıǵı apatpen kúreste keshendi tásil kerek — Prezıdent keńesshisi
ASTANA. KAZINFORM — Elimizde sý tasqyny basqa da tabıǵı apattardyń aldyn alýǵa arnalǵan keshendi sharalar ázirlenip jatyr.
Búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń Sý resýrstary jáne ırrıgatsııa mınıstrliginiń uıytqy bolýymen sý resýrstaryn turaqty basqarý máselelerine arnalǵan dóńgelek ústel ótti.
Atalǵan is-shara barysynda agenttik tilshisi Qazaqstan Respýblıkasy Prezıdentiniń keńesshisi — Prezıdenttiń halyqaralyq ekologııalyq yntymaqtastyq jónindegi arnaýly ókili Zúlfııa Súleımenovadan tasqyn sýmen kúres sharalaryna qatysty pikirin bilgen edi.
— Sý resýrstaryn tıimdi basqarý qajet, bul tek qana ınfraqurylym máseleleri ǵana emes, sonymen qatar tabıǵatqa negizdelgen sheshimderdi de qamtıdy. Sý-batpaqty jerlerdi qalpyna keltirý, sýdy tıimdi bólý taǵy sol sııaqty is-sharalar tasqyn saldarynyń aldyn alýǵa múmkindik beredi. Sondyqtan tabıǵı apatpen kúreste keshendi tásil kerek. Ótken jyly Er-Rııadta Memleket basshysy men Frantsııa prezıdentiniń bastamasymen «One Water Summit» sharasy ótti. Memleket basshysy sammıt barysynda jáne Bakýde ótken COP29 konferentsııasynda Qazaqstan táýekelderdi basqarýda keshendi júıesin engizetinin aıtty, — dep jaýap berdi Zúlfııa Súleımenova tilshisi saýalyna.
Sondaı-aq Prezıdent keńesshisi nelikten keshendi júıe kerek ekenin túsindirdi.
— Óıtkeni, táýekelderdi tek saqtandyrý turǵysynan qarastyrý nemese tek ınfraqurylym turǵysynan qarastyrý jetkiliksiz. Barlyq máseleni jan-jaqty qarastyrý qajet, onyń ishinde ekojúıeni qalpyna keltirý, ınfraqurylym, kontrrettegishter, sý qoımalary men basqa da nysandar salý jáne táýekelderdi saqtandyrý da bar, — dep tolyqtyrdy Z. Súleımenova.
Onyń aıtýynsha, qazir Úkimet atalǵan baǵytta belsendi jumys atqaryp jatyr.
Buǵan deıin Prezıdenttiń arnaýly ókili Kaspıı teńizi ıtbalyqtarynyń rezervaty qurylatynyn aıtqan edi.