Tabıǵattyń tosyn minezi basylar emes
ASTANA. Shildeniń 26-sy. QazAqparat - Jer sharynyń barlyq túkpirinde tabıǵat apattary órship tur, dep habarlaıdy «Vestı.Ru» basylymy.
Amerıkanyń Aıova shtatynda sý tasqyny qaýpiniń saldarynan júzdegen adam qaýipsiz aımaqtarǵa kóshirildi. Onda nóser jaýynnyń saldarynan bógetterdiń birin sý shaıyp ketip otyr. Eýropada da nóser jaýyn basylar emes. Al Ońtústik Amerıkada - sońǵy 50 jyldaǵy eń sýyq qys tirkeldi.
Tabıǵat apattaryna qatysty reportaj jasaǵan «Rossııa 24» telearnasynyń aqparatyna súıensek, AQSh-tyń Chıkago qalasynda qatty tsıklon oryn aldy. Oqıǵa saldarynan 50 myńnan astam adam jaryqsyz qalyp otyr. Megapolıstiń jekelegen aýdandarynda tutas turǵyn úı oramdaryn sý basyp qalǵan. Birneshe avtomagıstralder jabylǵan. Jergilikti energetıkalyq kompanııanyń aqparaty boıynsha, jaryq jelisin tolyq iske qosýǵa birneshe kún kerek. Al esesine, Nıý-Iorkte kerisinshe aptap ystyq. Kóleńdegi aýa raıynyń ózi - 38 gradýs shamasynda.
Bıylǵy shilde aıy ońtústik jartyshar úshin, onyń ishinde Perý úshin temperatýralyq rekordtarǵa baı mezgil bolyp otyr. Ońtústik Amerıka turǵyndary bıylǵy qys olar úshin sońǵy jarty ǵasyrdaǵy eń sýyq qys bolǵanyn aıtýda. Perýde eldiń jarty aımaǵynda tótenshe jaǵdaı jarııalanyp otyr. Onda termometr baǵamy mınýs 27 gradýsqa deıin tómendep, osymen ekinshi apta qatarynan qatty aıaz saqtalýda. Ondaǵan adam úsikten qaza boldy.
Al Chılı qalyń qardyń astynda qalyp otyr. Eldiń aýyl sharýashylyǵyna úlken shyǵyn keldi. Mal basyn saqtap qalý úshin, ókimet alys óńirlerge gýmanıtarlyq kómek retinde jem-shóp jetkizýde.
Tabıǵattyń tosyn minezinen Eýropa da zardap shegýde. Birneshe saǵatqa sozylǵan qatty jel men nóser jaýyn Polshany biraz ábirjitip tastady. Al Italııanyń soltústik aýdandarynda qatty daýyldyń saldarynan júzdegen atam baspanasyz qalyp otyr.
