Tabıǵatty paıdalanýshy qorshaǵan ortany bastapqyda bolǵan qalpyna keltirýge mindetti – mınıstr

NUR-SULTAN. QazAqparat – Elimizdegi 50 iri kásiporyndy eń ozyq qoljetimdi tehnologııalarǵa aýystyrý josparlanǵan. Bul týraly Senattyń jalpy otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Qorshaǵan ortanyń jaı-kúıin jaqsartýǵa múmkindik beretin Ekologııalyq kodekstiń negizgi bólimderine toqtalǵym keledi. «Lastaýshy tóleıdi» qaǵıdatynyń negizine lastanýdy boldyrmaý men baqylaý boıynsha is-sharalary jatady. Sonymen qatar, qorshaǵan ortaǵa tıgen zalaldy qalpyna keltirýge qatysty jaýapkershilik qarastyrylǵan. Osylaısha, memleket tabıǵat paıdalanýshylarǵa ekologııalyq aıyppul tóleýdiń ornyna qorshaǵan ortaǵa teris áserdi boldyrmaý jónindegi barlyq sharalardy qabyldaý tıimdirek bolatyndaı jaǵdaı jasaýy tıis», - dedi mınıstr QR Ekologııalyq kodeksiniń jobasyn talqylaý kezinde.

Budan basqa, ekologııalyq zalal oryn alǵan jaǵdaıda tabıǵat paıdalanýshy qorshaǵan ortany bastapqyda bolǵan qalpyna keltirýge mindetti.

«Eń ozyq qoljetimdi tehnologııalardy engizedi degen shartpen birinshi sanattaǵy obektiler úshin keshendi ekologııalyq ruqsattarǵa kóshý usynylady. Sondaı-aq jańadan iske qosylatyn kásiporyndar úshin keshendi ekologııalyq ruqsattar alý mindettiligi qarastyryldy. Eń ozyq qoljetimdi tehnologııalardy engizýdiń arqasynda elimizdegi ekologııalyh ahýal jaqsarady. Birinshi kezeńde munaı-gaz, taý-ken metallýrgııasy, hımııa jáne elektr energetıkasy salalaryna qatysty 50 iri kásiporyndy eń ozyq qoljetimdi tehnologııalarǵa aýystyrý josparlanǵan. Aıta keterlik, osy 50 kásiporynǵa jalpy lastanýdyń 80 paıyzy tıesili», - dedi Maǵzum Myrzaǵalıev.

Kodekstiń jobasynda birinshi sanattaǵy iri kásiporyndarǵa qatysty qorshaǵan ortaǵa áserdi baǵalaýdy ótý týraly talap qarastyryldy. Olardyń tizbesi qaıta qaraldy jáne negizinen ekologııalyq qaýipti obektilerge basa nazar aýdarylatyn bolady.