Tabıǵatty qorǵaýshy ınspektorlardyń quzireti keńeıdi

NUR-SULTAN. QazAqparat - Tabıǵatty qorǵaý ınspektorlary quqyq búzýshylardy ustap, qylmysty tirkeı alady. Bul týraly QR Ekologııa, geologııa jáne tabıǵı resýrstar vıtse-mınıstri Erlan Nysanbaev málimdedi, dep habarlaıdy QazAqparat tilshisi.

Jańa ózgerister «QR keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» QR zańynda kórsetilgen.

«Bizdiń memlekettik ınspektorlarǵa shabýyl jasalǵany týraly sońǵy oqıǵalardan keıin ınspektorlardyń ómiri men densaýlyǵyn qorǵaý úshin shara qabyldaýǵa týra keldi. Ol úshin ınspektorlardyń nemese jaqyndarynyń ómirine qastandyq nemese zorlyq-zombylyq úshin jaýapkershilikti kúsheıtý jumystary júrgizilip jatyr», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, memlekettik ınspektorlardyń qyzmettik avtokólikterine arnaıy daýys zoraıtqysh quraly men arnaıy dabyldar ornatylady.

«2012 jyldyń 24 mamyryndaǵy Úkimettiń № 670 Qaýlysymen retteletin qyzmettik qarý men arnaıy quraldardy qoldaný tártibin de qaıta qarap jatyrmyz. Onda ınspektor ózine oq atylǵan jaǵdaıda ǵana qarý qoldanýǵa quqyly. Zań arqyly Orman kodeksine, «Aıryqsha qorǵalatyn tabıǵı aýmaqtar týraly» jáne «Janýarlar álemin qorǵaý, paıdalaný týraly» zańdarǵa vedomstvoǵa ýákiletti organ men onyń aýmaqtyq bólimshelerin qadaǵalaý fýnktsııasy jóninde ókilettik berý týraly túzetýler engizildi», - dedi Erlan Nysanbaev.

Qadaǵalaý fýnktsııasynyń bolýy ınspektorlarǵa jeke jáne zańdy tulǵalardyń zańǵa qaıshy áreketine jedel jaýap qatýǵa (toqtatý, qujat tekserý, ustaý, aýlaý quraldaryn, qarý-jaraqty tárkileý) jedel shara qabyldaýǵa múmkindik beredi. Odan bólek, aýlanǵan ań-qus pen balyq ta tárkilenedi. Bul sharalar jeke tulǵalarǵa da, zańdy tulǵalarǵa da qatysty.