Tabıǵatty qorǵaý mekemeleriniń materıaldyq-tehnıkalyq bazasyn nyǵaıtýǵa 32,5 mlrd teńge qajet
ASTANA. QazAqparat – Tabıǵatty qorǵaý mekemeleriniń materıaldyq-tehnıkalyq bazasyn nyǵaıtýǵa 32,5 mlrd teńge qajet. Bul jaıynda Senat depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«Bıyl respýblıkalyq bıýdjetten bólinetin 254,6 mln teńgege Qyzylorda oblysynyń memlekettik orman qoryn zııankesterge qarsy óńdeý josparlanǵan. Óıtkeni, tek osy óńirde ǵana zııankester zaqymdaǵan aýmaq 1 myń gektardan asyp jyǵylady. Buǵan qosa, jergilikti atqarýshy organdar 169 myń gektar aýmaqty alyp jatqan ormandy zııankesterden jáne aýrýlardan óńdeýdi jergilikti bıýdjet esebinen júzege asyrýdy josparlap otyr», - dep atap ótedi Úkimet basshysynyń birinshi orynbasary jaýabynda.
Sonymen qatar, onyń atap ótýinshe, Memleket basshysynyń Qostanaı oblysyndaǵy tabıǵı órtti joıý jónindegi jedel shtab otyrysynda bergen tapsyrmalaryn júzege asyrý aıasynda respýblıkalyq tabıǵatty qorǵaý uıymdarynyń jáne jergilikti atqarýshy organdardyń orman sharýashylyǵy memlekettik mekemeleriniń materıaldyq-tehnıkalyq bazasyn nyǵaıtý jónindegi keshendi is-sharalar qabyldanyp jatyr.
«2027 jylǵa deıin aqsha qarajatynyń qajettiligi 32,5 mlrd teńge bolmaq. 2023-2027 jyldarǵa arnalǵan azamattyq qorǵanys salasyndaǵy birinshi kezekti is-sharalar keshendi jospary aıasynda tehnıkalar satyp alý josparlanǵan. Qazirgi ýaqytta qarjylandyrý máselesi pysyqtalyp jatyr», - dedi Roman Sklıar.
