Tabıǵatty búldirýshilerge salynatyn jańa aıyppul kólemi qandaı
NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev tabıǵatqa keltirilgen zardaptar boıynsha jaza qalaı qatańdatylatynyn aıtyp berdi, dep habarlaıdy QazAqparat tilshisi.
«Birinshiden, tabıǵatty qorǵaý salasyndaǵy quqyqbuzýshylyqtar boıynsha aıyppul 10 AEK-ten 20 AEK-ke (1 AEK – 2778 teńge) ósedi. ıAǵnı, eki ese. Orta bıznes sýbektilerine 30-75 AEK-ke deıin, iri bızneske 500 AEK-ke deıin aıyppul salynady. Sonymen qatar qorshaǵan ortany qorǵaý salasyndaǵy jumys istep júrgen mamandardyń quzyry da artady», - dedi Maǵzum Myrzaǵalıev Úkimettiń baspasóz ortalyǵynda ótken brıfıng barysynda.
Mınıstrdiń sózinshe, endi kópshilik tutynatyn qoǵamdyq oryndardy bylǵaý áreketterine, qalalar men eldi mekenderdegi jasyl jelekke zııan keltirýge, sý resýrstaryn qorǵaý erejesin, ormandaǵy órt qaýipsizdigi talaptary men sanıtarlyq erejelerdi buzýǵa, orman faýnasyn joıǵan nemese zııan keltirýge jáne ormanǵa qoqys, hımııalyq zattar tastaýǵa, basqa da orman qoryna keltirilgen zalalǵa qatysty aıyppuldar quny artpaq.
Eske sala ketsek, Memleket basshysy Qasym-Jomart Toqaev tabıǵatqa zııanyn tıgizgen zańbuzýshylarǵa salynatyn aıyppul qunyn ulǵaıtýdy tapsyrǵan bolatyn.
Óz kezeginde M.Myrzaǵalıev tabıǵatqa qatygezdik tanytý faktilerimen kúrestiń eki sheshimi týraly aıtty. Onyń biri – ekologııalyq bilim berý, ekinshisi – aıyppul salý.
Sondaı-aq mınıstr ekologııaǵa zalal keltirilse, tabıǵat paıdalanýshy qorshaǵan ortany bastapqy qalpyna keltirýge mindetti bolatynyn málim etken edi. Onyń sózine qaraǵanda, bul prıntsıp lastanýdyń aldyn alýdy jáne baqylaý sharalaryn, sondaı-aq qorshaǵan ortaǵa keltirilgen zalaldy qalpyna keltirý úshin jaýapkershilikti kúsheıtedi.
