Tabıǵattyń tosyn minezi: Aral kóshelerin sý basty
QYZYLORDA. KAZINFORM - Keshe, 31 shilde kúni saǵat 15:15 shamasynda Qyzylorda oblysynyń Aral aýdanynda kún raıy kúrt buzylyp, burshaq aralas nóser jańbyr jaýyp, ekpindi jel turdy. Sonyń kesirinen Aral qalasyndaǵy áleýmettik nysandar men kásipkerlik ǵımarattarǵa, turǵyn úılerge, taǵy basqa qoǵamdyq aýmaqtarǵa zaqym keldi. Bul týraly aýdan ákimdiginiń baspasóz qyzmeti habarlady.
Qalanyń ortalyq kóshelerin sý basyp, kólikter men jaıaý júrginshilerdiń qozǵalysyna qıyndyq keltirdi. Jaǵdaıdy qalypqa keltirý maqsatynda tótenshe jaǵdaıdyń aldyn alý jáne ony joıý jónindegi aýdandyq komıssııa otyrysy ótti. Komıssııa tóraǵasy, aýdan ákiminiń orynbasary Erkin Ábishev qaladaǵy ahýaldy turaqty baqylaýǵa alyp, barlyq mekeme basshylaryna jaǵdaıdy qalypqa keltirýdi tapsyrdy.
- Qazirgi kezde Aral qalasyndaǵy shaǵyn aýdandarda jáne aýdanǵa qarasty aýyldyq okrýgterde jaǵdaı turaqty baqylaýǵa alynyp, tirshilikti qamtamasyz etýshi mańyzdy ınfraqurylymdyq jeliler qaıtadan qalpyna keltirilip jatyr. Sondaı-aq sý basqan kósheler arnaıy sýsorǵysh tehnıkalardyń kómegimen tazartyla bastady. Kommýnaldyq sala qyzmetkerleri kúsheıtilgen rejımge kóshti. Jaǵdaıdy qalpyna keltirý baǵytynda jumysshy top úzdiksiz qyzmet atqarady, - delingen habarlamada.
Qalyptasqan jaǵdaı aýdan ákimdiginiń qatań baqylaýynda. Bul baǵytta arnaıy kezekshilikter uıymdastyryldy.
Aýdan ákimdigi turǵyndardy tabıǵattyń tosyn minezinen bolǵan ýaqytsha qolaısyzdyqtarǵa túsinistik tanytyp, sabyr saqtaýdy surady.
Sınoptıkter 31 shildede Qazaqstan aýmaǵynda qaýipti meteorologııalyq qubylystardy boljaǵan edi.
