Tabıǵatta demalǵyńyz kelse: ShQO-da qysta qaıda barýǵa bolady
Shyǵys Qazaqstan – tabıǵat tamashasyn boıyna sińirgen ólke. Aspanmen astasqan taýlardyń bókterindegi demalys bazalaryna baryp, shańǵymen syrǵanap, ıt tumsyǵy ótpeıtin ný orman arasyndaǵy úıshikterde aıaldap, saf aýamen tynystaý boıǵa qýat, janǵa rahat syılaıdy. Osy rette Kazinform tilshisi óńirdegi demalys bazalary jaıly aqparat jınastyryp kórdi.
«Nurtaý» demalys bazasy
Nurtaý Óskemennen 35 shaqyrym, Glýbokoe aýdany Bobrovka aýylynan 8 shaqyrym jerde ornalasqan. Kezinde «Bıpek Avto» kompanııasynyń basshysy Anatolıı Balýshkınniń ıeliginde bolǵan. Oǵan qatysty sot isi bastalǵaly demalys bazasynyń jumysy toqtap qalǵan-tuǵyn. Alaıda halyqtyń suranysymen ShQO ákimdigi quzyrly organdarmen kelissóz júrgizip, 2023 jyly baza qaıta ashyldy.
Qala turǵyndarynyń deni osy jerge kelip demalady. Ásirese jastar qarasy kóp. Onda tómendegideı qyzmetter usynylǵan:
- ilmekti kótergishpen jabdyqtalǵan eki taý shańǵysy trassasy;
- stıýbpen syrǵanaýǵa arnalǵan jeke trassa;
- shańǵy teýip úırenetin jeke jolaq;
- taý shańǵysy jaraqtaryn jalǵa alý jáne jóndeý;
- shańǵy tebýge úıretetin mektep (balalar men eresekterge, jekeleı jáne toppen baryp, arnaıy mamannan dáris alý);
- «Terem Ok» atalatyn tárbıeshisi bar balabaqsha. Bir saǵaty – 3 500 teńge. Túrli oıyndar oınaýǵa múmkindik beretin shyǵarmashylyq úıirmeler de bar;
Bazadaǵy qonaqúıdiń kelýshilerge árdaıym esigi ashyq. Munda monshaǵa túsip, massaj alýǵa bolady. Júzýdi jaqsy kóretinder úshin basseın jumys istep tur. Sondaı-aq kottedjderdi jalǵa ala alasyz. Baǵasy bir kúnge 230 myń teńge men 500 myń teńgege aralyǵynda ekenin aıta keteıik.
«Sınegore» demalys bazasy
Rıdder qalasynyń mańyndaǵy Gromotýha ózeniniń jaǵasynda ornalasqan. Aınalasyn qaraǵaıly orman qorshap tur.
Demalys orny tynyǵýshylar úshin:
- konkı tebý;
- shańǵymen júgirý;
- stıýbpen taýdan syrǵanaý;
- sporttyq jabdyqtardy jalǵa alý qyzmetterin usynady.
Bir aıta keterligi, atalmysh demalys bazasynda jeltoqsan aıynyń 14-29 kúnderi aralyǵynda Aıaz ata rezıdentsııasy jumys istep turady. Aq saqaldy Aıaz ataǵa ata-analar balalaryn ertip ákele alady.
«Altaı alpisi» taýshańǵy kesheni
Óskemennen 24 shaqyrym jerde, taýly Úlbi shatqalynda oryn tepken. Munda shańǵyshylar men snoýbordshylar tek Qazaqstannan emes, álemniń túkpir-túkpirinen keledi. Baǵasy salystyrmaly túrde basqalardan arzan. Qonaqúıdegi eki adamdyq lıýks bólme aqysy jumys kúnderi – 65 myń teńge, demalys kúnderi – 78 myń teńge. Bul baǵaǵa tańǵy jáne tústi as kiredi. Al jartylaı lıýks 34-40 myń teńge aralyǵynda.
Keshende tórt arqandy jolaq bar. Jolaqpen kóterilip, taýdan shańǵymen syrǵanap túsesiz. Taý-shańǵysy jabdyqtaryn jalǵa alýǵa bolady. Onda shańǵy, snoýbord jáne stıýb ala alasyz.
Taý-shańǵy jáne snoýbord mektebi jumys isteıdi. Jekeleı jáne toppen sabaq ótýge múmkindik bar. Budan bólek, salt atpen serýendeýge bolady. 15 mınýty – 2000 teńge, bir saǵaty – 5000 teńge. Balyq aýlaýǵa qyzyǵatyndar da osynda qulshyna keledi. Qarmaqty jalǵa alý – 1000 teńge, aýlanǵan balyqtyń bir kelisi – 4 500 teńge.
«Zınovevka» demalys orny
Óskemennen 85 shaqyrym jerde tur. Demalys orny qalyń ormannyń qaq ortasynda ornalasqandyqtan kelýshiler tabıǵatty alańsyz tamashalap, sergek serýen quryp qaıtady. Odan bólek, munda shańǵymen taýdan tómen qaraı syrǵanaýǵa bolady. Kvadratsıkl jáne qarda júretin kólikpen qydyra alasyz. At jegilgen shanaǵa 4 adam otyryp serýendeý úshin de barlyq jaǵdaı jasalǵan. Stıýbpen syrǵanap, muz aıdynynda konkı tebýge bolady.
«Klımovka» demalys bazasy
Rıdderden 30 shaqyrym jerde ornalasqan. Bul – otbasylyq demalys orny.
Altaı taýynyń bókterindegi bazada 11 úı bar. Onyń ishinde peshpen jylytylatyn 7 jáne fın tehnologııasy boıynsha jasalǵan 4 aǵash úıdiń esigi kelýshiler úshin árdaıym ashyq. Olar bir ýaqytta 40 demalýshyny qabyldaı alady. Osynshama adamǵa arnalǵan ashana jumys isteıdi. 4 monshanyń ekeýinde basseın bar. Demalys ornynda mynadaı qyzmet túrleri kórsetiledi:
- stıýbpen syrǵanaý;
- salt atpen, esekpen serýendeý;
- ormandy aralaý,
- shańǵy tebý;
- zoobaq.
