Tabıǵatqa zııan keltirgender qalaı jazalanbaq — Ponomarev

ASTANA. KAZINFORM — Elimizdiń jańa Konstıtýtsııa jobasynda ekologııa máselesi memlekettik saıasattyń eń joǵary deńgeıine kóterildi. Parlament Májilis depýtaty Sergeı Ponomarev jańa jobadaǵy ózgerister tabıǵatty aıalaýdy qatań zańdyq talapqa aınaldyratynyn jetkizdi.

Depýtattyń aıtýynsha, ekologııa máselesi tek senbiliktermen shektelmeıdi. Jańa Konstıtýtsııanyń 37-babynda azamattardyń tabıǵatty saqtaý jáne onyń baılyqtaryna uqypty qaraý mindeti naqtylanǵan.

— Biz ondaǵan, tipti júzdegen jyl boıy tabıǵattan tek alyp keldik. Ony qazdyq, burǵyladyq, paıdalandyq. Endigi kezek — ony saqtaý. Balalarymyz taza elde ómir súrýi úshin tabıǵat baılyǵyn meılinshe únemdi ári uqypty paıdalanýymyz kerek, — dedi Ponomarev.

Sondaı aq eń ózekti máseleniń biri — qorshaǵan ortany lastaıtyn iri kásiporyndar men aqparatty jasyratyn laýazymdy tulǵalardyń jaýapkershiligi. Jańa zań jobasy boıynsha tabıǵatty lastaǵan óndiris oryndary men buǵan kóz jumǵan sheneýnikter zań aldynda jaýap beredi. Adam ómirine, densaýlyǵyna jáne qorshaǵan ortaǵa qaýip tóndiretin derekterdi jasyrǵan laýazymdy tulǵalarǵa qatań jaza qoldanylady.

Depýtat bul normalar qabyldanǵannan keıin, ekologııalyq talaptardy retteıtin jańa zańdar paketi ázirlenetinin aıtty.

Budan bólek, májilis depýtaty Almaty qalasyndaǵy ekologııalyq ahýalǵa da toqtaldy. Qazirgi tańda qalanyń aýasyn tazartý baǵytynda jumystar atqarylyp jatqanyn aıtty.

— TETs-2 stantsııasyn gazǵa kóshirip, zııandy qaldyqtardy aıtarlyqtaı azaıtpaq oıymyz bar. Sonymen qatar, qala aýmaǵynda dızel men kómirdi paıdalanýǵa qatań shekteýler qoıylyp, aýany lastaıtyn eski kólikterdiń qozǵalysyna baqylaý kúsheıtilmek, — deıdi ol.

Aıta keteıik, buǵan deıin, konstıtýtsııalyq reforma jónindegi komıssııa múshesi Serik Egizbaev ekologııalyq jaýapkershilikti ulttyq qundylyq retinde Ata Zańda bekitý qajettigin aıtqan edi.