Tabıǵatqa zııan keltirgen adam ony óz esebinen óteýge mindetti
ASTANA. KAZINFORM — Qazaqstanda qorshaǵan ortany lastaǵan tulǵa keltirilgen ekologııalyq zalaldy óz esebinen joıýǵa mindetti. Ekologııalyq kodekste bekitilgen «lastaýshy tóleıdi» qaǵıdaty aıyppulmen shektelmeı, tabıǵatty qalpyna keltirý jaýapkershiligin de kózdeıdi. Bul týraly Ekologııa mınıstrligi málim etti.
Kásiporynnyń qyzmetinen topyraq lastansa, ózenge nemese ósimdikter men janýarlar dúnıesine zııan kelse, onyń saldaryn kim joıýy kerek? Qazaqstan zańnamasyna sáıkes, ekologııalyq zalal keltirgen tulǵa ony óz esebinen joıýǵa mindetti. Bul talap Ekologııalyq kodekste bekitilgen «lastaýshy tóleıdi» qaǵıdatyna negizdelgen.
«Lastaýshy tóleıdi» qaǵıdaty neni bildiredi?
Qazaqstan Respýblıkasynyń Ekologııalyq kodeksiniń 136-babyna sáıkes, ekologııalyq zalal keltirgen tulǵa búlingen tabıǵı orta quramdastaryn óz qarajaty esebinen tolyq kólemde qalpyna keltirýge mindetti.
ıAǵnı jaýapkershilik tek aıyppul tóleýmen shektelmeıdi. Kináli tulǵa keltirilgen ekologııalyq zalaldy joıýǵa baǵyttalǵan qajetti sharalardy da qabyldaýy kerek.
Neni bilý mańyzdy?
Aıyppul tóleý zalaldy joıý mindetinen bosatpaıdy. Ekologııalyq zalal keltirgen tulǵa ákimshilik nemese qylmystyq jaýapkershilikke tartylǵannyń ózinde, zańda kózdelgen azamattyq-quqyqtyq jaýapkershiliginen bosatylmaıdy.
Tabıǵı ortany qalpyna keltirý qajet. Ekologııalyq zalaldy joıý kezinde búlingen tabıǵı orta quramdastaryn qalpyna keltirýge baǵyttalǵan sharalar qabyldanady. Munyń maqsaty — keltirilgen zııannyń saldaryn joıý jáne tabıǵı ortanyń jaǵdaıyn qalpyna keltirý.
Zalaldyń sıpaty men kólemi anyqtalýy tıis. Ekologııalyq kodekstiń 131-babynda ekologııalyq zalaldyń belgileri aıqyndalǵan. Atap aıtqanda, tabıǵı orta jaǵdaıynyń tikeleı nemese janama túrde ólshenetin jaǵymsyz ózgerýi ne onyń paıdaly qasıetteriniń nasharlaýy eskeriledi. Zalaldy joıý mindetin qoldaný úshin zańda belgilengen negizder men tıisti mán-jaılar anyqtalýy qajet.
Zań ne deıdi?
Qazaqstan Respýblıkasynyń Ekologııalyq kodeksindegi «lastaýshy tóleıdi» qaǵıdaty qorshaǵan ortany lastaýdyń aldyn alýdy ǵana emes, keltirilgen ekologııalyq zalaldy joıýǵa jumsalatyn shyǵyndy jaýapty tulǵanyń kóterýin de kózdeıdi.
Demek, tabıǵatqa keltirilgen ekologııalyq zalal nazardan tys qalmaýy kerek. Zańda belgilengen jaǵdaılarda ony joıý jáne búlingen tabıǵı ortany qalpyna keltirý mindeti zalal keltirgen tulǵaǵa júkteledi.
